“ТАТАРЛАР” ДИСКОТЕКАСЫНДА ЯЗ БЕТӘ ДӘ, ҖӘЙ ҖИТӘ!

20 майда Казанның «Пирамида» төнге клубында татар яшьләре арасында шактый танылып өлгергән «Татарлар» дискотекасы узачак. Чираттагы дискотеканың исеме бик тә үзенчәлекле: «Май үтә дә җәй җитә». Димәк, быелгы язда бу «Татарлар» дискотекасы соңгысы булачак. "Соңгы" сүзеннән куркырга кирәкми, җылы җәйгә аяк баскач, «Татарлар» җәйге бию кичәләре сезонын ачар дип көтелә.

 Ә менә язның соңгы кичәсен һәркемгә мәгълүм шоу-мен, җырчы Зөлфәт Зиннуров алып барачак, аның башкаруында җырларны да ишетеп булачак. Моннан тыш «Хат» төркеме, Диана Таҗетдинова да үзләренең музыкаль күчтәнәчләрен бүләк итәргә җыена. Алдан әйтергә кирәк, «Татарлар» дискотекасы өчен матур традициягә әверелгән go-go юнәлешендәге һәм татар халык биюләренә кушылып бию - бу төнне мәҗбүри. Һәрвакыттагыча яшьләрне бары тик иң дәртле, заманча һәм татар көйләренә ди-джей Danila, Lilu, Aivaz биетәчәк. Әлеге ди-джейларны «Татарлар» дискотекасына һәрдаим йөрүче егетләр һәм кызлар үз итеп өлгерде инде.

Дискотекада оештырылачак бәйгеләрдә катнашкан яшьләрне истәлекле бүләкләр көтә. Чараның мәгълүмати иганәчесе булган «Intertat.ru» Республика электрон газеты да сюрприз әзерли. Дискотеканы шулай ук Мatbugat.ru һәм Tamasha.ru сайтлары да яктыртачак.

20 майда «Пирамида»да узачак «Татарлар» дискотекасына керү бәясе — 150 сум, көнендә — 250 сум була. Тамаша кичке тугыздан иртәнге дүрткә кадәр дәвам итәчәк.

Мәгълүм булганча, «Татарлар» дискотекасының «Рэп battle» дип исемләнгән әле күптән түгел генә үткән кичәсендә татар җырчылары R&B һәм рэп укып, үзара ярышкан иде. Бу чара татар яшьләре арасында әлеге музыкаль агымнар белән шөгыльләнүче яшьләрне барлау максатын күздә тотты. Гомумән, «Татарлар» һәр дискотекага кабатланмас рух кертергә омтыла. Шул ук вакытта һәр кичә бер-берсе белән тыгыз бәйләнештә тора, чөнки аларны бер максат берләштерә - яшьләрне татар көйләренә якынайту, татар яшьләрен үзара таныштыру һәм дуслаштыру.