Сынау дип кабул иттем

Матур гына яшәп ятканда, Кадыйровлар гаиләсенең аяз күген болыт каплый. Яшьләрнең киләчәккә планнары ташып торган чак. Олы улларына иптәшкә энекәш алып кайтуның шатлыклы мизгелләрен кичерәләр. Тик бу уйларны, хыялларны бер яше тулмаган Дамирга табиб­лар куйган куркыныч диаг­ноз җимереп ташлый.

Кечкенә малайда тетрапарез, ДЦП һәм башка авырулар табалар, баш миенең үсеше тоткарлыклы булганын ачыклыйлар. “Балаңа салкын тисә, борынына томау төшсә яки тән температурасы күтәрелсә дә, төн йокыларың кача. Ә менә сабыеңа табиблар куркыныч яңгыраган диагнозлар куйса, бөтенләй югалып калсың икән ул, – ди Яшел Үзән районының Осиново бистәсендә яшәүче Айгөл Кадыйрова. – Ә бит авырлы вакытта барысы да яхшы иде. Бер җирем дә авыртмады. УЗИга баргач та борчылырлык әйбер әйтмәделәр. Тик көтеп алган сабыебызның ике ае да тулмаган вакытта аның авыру икәнен әйттеләр. Вакытында дәваласаң, бу авырудан котылырга мөмкин икән. Шунлыктан вакытны сузмыйча, тизрәк дәваланырга булдык”.

Табиблар Дамирга Чехиядәге бер санаторийда дәваланырга киңәш итә. Алар шулай эшли дә. Барлык булган акчаларын җыеп юлга кузгалалар. Беренче дәвалау курсын узуга балада үзгәрешләр сизелә. Өянәкләре күзгә күренеп кими. “Интернетта авыру балалар турында берәр хәбәр күрсәм, минем балам белән дә шулай була күрмәсен, дип тели идем. Бар курыкканым  баланың авыру булуы иде. Инде менә Аллаһы Тәгалә безгә дә сынау бирде. Мин хәзер баласы авыру әни­ләрнең хәлен аңладым. Га­зизең­нең ярдәмгә мохтаҗ икәнен күрү, кирәк вакытта аңа булыша алмау үзәкне телгәли. Гаиләдә ирем генә эшли. Шунлыктан дәвалану өчен мөмкинлегебез җитеп бетми. Чехия клиникасына барып кайту өчен 150 мең сум акча кирәк. Дәвалану нәтиҗәле булсын өчен ике айга бер тапкыр барырга кирәк. Безнең гаиләгә ярдәм кирәген белгәч, бик күп кешеләр булышты”, – ди Айгөл.

Хәзер Дамир утырырга өйрәнә, үрмәли башлаган. Карап торышка аны авыру дип әйтеп тә булмый. Баласы тизрәк аякка бассын, башка сабыйлар белән бер бакчага барсын, бер мәктәптә белем алсын өчен тырыша аның әти-әнисе. Ә Дамирга көн саен дару алырга, дәвалануын дәвам итәргә акча кирәк. “Танышлар, дуслар, туганнар гел ярдәм итеп тора. Хәтта бер белмәгән кешеләр дә үзеннән өлеш кертә. Матди хәлебез нык булса, кешедән ярдәм дә сорамас идек. Тик булмый шул, – дип өзгәләнә әнисе. – Бәлки, газета укучылар арасында Дамирның язмышына битараф калмаучылар табылыр”.

Андыйлар өчен акча кү­черү исәп-хисаплары:
Сбербанк
4276 8620 1156 7965
МОБИЛЬНЫЙ БАНК на номер 900 в сообщении написать:
перевод #телефона и сумма номер 8 (987) 4187471
Акча күчерү өчен телефон: 89874187471