Илназ Сафиуллин үз-үзен яндырган

Әле генә дөнья күргән “Рәхмәт” исемле клибында Илназ Сафиуллин үз-үзен яндырып үтерә.

– Илназ, андый кеше тәмуг кисәве булачак бит, ник алай эшләдең?

– Сюжет буенча, кыз образы юкка чыккач, егет канистрдан бензин салып үзенә ут төртә. Кыз бала кояш чыкканда эреп югала. Бу клип тамашачылар тарафыннан бик авыр кабул ителәчәк. Күпчелек татар клибларында сюжет линиясе төп-төгәл бара, әмма мин алай эшләргә яратмыйм. Фәлсәфи җырдан соң әз генә уйланырга да кирәк. Аллага ышанам, Коръән ашлары уздырам, догалар укыйм.

– Шулай да, үз-үзеңне яндыру ярамый бит инде?!

– Әлбәттә, ярамый. Әмма кыз югалгач, егет шундый карарга килә.

– Кыз образы ник югала соң?

– Бу иҗат кешесенең музасы булырга мөмкин. Җанлы кеше образы түгел. Клипта без бер-беребезгә кагылмыйбыз да, карамыйбыз да.

– Яндыргач, егет нәрсәгә ирешә?

– Андый сорау куелмый, моны тамашачы үзе уйлап бетерергә тиеш. Мәгънәсен ул үзе генә күрә ала.

– Бу мәгънәсез клип түгелме?

– Кемдер мәгънәсез дип саный икән, ул да хаклы.

– Бүтән төрле сюжет башыңа килмәдеме?

– Төрле вариантларны уйладым. Әмма тамашачының маңгаена бәрә торган клип ясыйсым килмәде.

– Тәмугка ышанасыңмы?

– Әйе.

– Бу клип өчен сине шунда яндырмаслармы?

– Юк.

– Үзеңне ничек рәткә китерәсең?

– Иҗатка күмелеп, гитарада уйнап, китаплар укып, тынычлыкта утырып.

– Өйләндеңме әле?

– Юк. Йөргән кызым бар.

Илназ Сафиуллин белән сөйләшеп бетергәч, “Туган авылым” мәчете имамы Илнар хәзрәт Зиннәтуллинга мөрәҗәгать иттем.

– Илнар хәзрәт, Илназ Сафиуллин “Рәхмәт” исемле клибында үз-үзен яндыра, болай кыланырга ярыймы?

– Якынын югалту белән кеше үзен үтерсә, димәк, бу кеше зәгыйфь, үз-үзенә хуҗа түгел дигән сүз. Үз-үзеңне үтерү динебез буенча зур гөнаһ санала. Болай эшләргә ярамый.

Кемнедер Аллаһы Тәгалә алган икән, Аңа шөкер кылабыз: “Йә, Раббым, Үзең бирдең, Үзең алдың. Иннәә лилләһи вә иннәә иләйһи рааҗигун”, – дибез. Бу дөньяда югалтусыз булмый. Аллаһы Тәгалә: “Без сезне малыгызны, җаныгызны, якыннарыгызны алып, уңышсызлык белән сынарбыз”, – ди. Әби-бабаларыбыз, әти-әниләребез, алардан алдарак балаларыбыз, хатын-иребез үлеп китәргә мөмкин. Мондый вакытта үзеңне кулда тота белергә тиешсең. Безнең өчен иң беренче урында Аллаһы Тәгалә булырга тиеш. Аллаһы Тәгаләне югалтмаска кирәк, бу иң зур фаҗига.

Клипта исә үз-үзеңне яндыруны образ дисәк тә була: сөйгәнең югалгач, син мәхәббәттән көеп яндың, көлгә, күмергә әйләндең. Ләйлә белән Мәҗнүн стилендә. Ислам дине яратуны инкарь итми, әгәр ул әдәпле кысаларда булса. Бер гарәп шагыйре яза: “Сөйгәнемне, әгәр аңа кагылмасам, күбрәк яратам. Ул шундый чиста, мин аңа кагылырга да куркам. Чиста булганга, бозылмаганга күрә мин аны көннән-көн ныграк яратам”, – ди. Аллаһы Тәгаләне ярату хисе көчлерәк булса, калган хисләрне җиңәргә мөмкин.