15.04.2015 Шоу-бизнес

Психолог Рамил Гарифуллин "Голос.Дети" турында: Балалар тапшырулары сексуальлек ягына басым ясап ялгыша

Соңгы вакытта халыкның Сәйдә Мөхәммәтҗанова язмышы белән кызыксынуы артты. “Голос. Дети” тапшыруында татарча җырлаган озын толымлы тыйнак кыз самимилеге белән татарлар күңеленә генә хуш килмәгәндер. Ник дигәндә, ул финалга үтә алмагач, “Беренче канал” җитәкчелегенә ризасызлык белдерүчеләр саны Россия буенча шактыйга җыелган.

Шоу-бизнесның үз законнары. Финалга үтәр өчен өстәмә этап халык үтенеченә карап кына оештырылмагандыр. Ни генә булса да, Сәйдә җанатарларында өмет уянды. Ләкин әлеге этапның турыдан-туры эфирын караучылар арасында Сәйдә үтә алмас инде дип борчылучылар да шактый булды. Чөнки кызыбыз үтә тыйнак, тамашачыга мөрәҗәгать иткәндә дә миңа тавыш бирегез дип чәчрәп – чыкмады. Сүзен: “Без бит – балалар, ниндидер роботлар түгел, елыйбыз да...” – дип йомгаклады ул. Әмма барысын да шаккатырып 56 балл җыйды.

Сәйдәнең иҗади үсешен психолог Рамил Гарифуллин да күзәтеп бара икән. Ул менә шундый балалар өчен бәйгеләр кирәк дигән фикердә:

– Җиңүгә омтылышлары бик каты көчле булган балалар бар. Алар үзләрен бүләкләүләрен, бәяләүләрен көтә. Бу бит – иҗатка зур этәргеч. Әлегә баланың иҗатын бәяләүдә конкурстан кала берни дә уйлап чыгарылмаган. Әйтик, бала, чыннан да, зур талантка ия, ә ул бәяләнми икән – бу да яхшы нәтиҗә түгел. Шулай итеп, бәйгеләр балалар уңышын бәяләүнең традицион ысулы булып тора. Әмма монда бер чиктән икенчесенә ташланмаска кирәк. Еш кына ата-аналар балалары җиңсен өчен куркыту ысулын куллана. Алар фикеренчә, ел саен беренче урын булырга тиеш. Алай түгел икән, бу – чын мәгънәсендә афәт. Сабый бәйгене курку, тәшвишләнү белән көтеп ала. Еш кына сабый сына. Җиңелгән баланың үз-үзен тотышы үзгәрә. Ул депрессиягә бирелә яки чыгырыннан чыгучанга әйләнә”.

Психологның борчылуы юкка. Сәйдәнең әти-әнисе балаларының күңеленә иман орлыгы салган, максатка сабырлык аша ирешүне алга сөрәләр. Бу бәйгедә катнашыргамы-юкмы дигән сүз чыккач та, Айрат хәзрәт, кызының “Беренче канал”дан татар җыры яңгырата алуына көче җитә дип саный. Шулай итеп тәвәккәллиләр дә. Юраганнары юш килә. Безгә артыгы кирәк түгел иде ди ул һәм бүген Сәйдәнең сәламәтлеге өчен бик нык борчылуын җиткерде:

– Туры эфирдан соң бер көн ял итте дә, Сәйдәбез Мәскәүнең Кремль Сараендагы чарада катнашты. Ул анда яратып җырлый торган “Су буйлап” җырын башкарды. Аннан финал өчен Сергей Жилин белән бер репетиция ясадылар. 17се көнне тагын бер репетиция була да, кич белән эфирга чыгачак. Сәйдә финалда татарча җырлыйсым килә дигән иде. Әмма каналның үз кагыйдәләре, нинди җыр тәкъдим итсәләр, шуны башкарырга туры килә. Бүген без җиңү турында уйламыйбыз, бу зур сынаудан Сәйдәнең исән-имин чыгуын телибез. Бу – бала өчен бик зур стресс, камера алдында үзен тыныч тотса да, эчендә ни кайнаганын бер Алла гына белә. Сәйдәбез ябыгып бетте. Дөресен генә әйткәндә, финалга үтмәгәч, хәтта шатланган да идек.

Ни өчен Сәйдә “Беренче канал” тамашачысы мәхәббәтен яулады соң? Ни сәбәпле ул иң күп тавышны җыйды? Чөнки ул тапшыруга балалык самимилеген өстәде. Башкалардан аермалы буларак, Сәйдә зурларча кыланмый. Рамил Гарифуллин да балалар тапшырулары сексуальлек ягына басым ясап ялгыша дип саный. Мисалга ул “Беренче канал”дагы “Утренняя звезда” тапшыруын китерде. Аныңча, тапшыру финалга эләкмәгән балаларга психологик җәрәхәт салу сәбәпле ябылган. “Юрий Николаев, чыннан да, зур проблемаларга юлыкты. Беренчедән, балаларда сексуальлек күрсәткече зур иде. Алар өлкәннәргә охшап калды. Икенчедән, балалар психикасына зыян салынды һәм күпме акча сарыф ителеп тә, нәтиҗәсе булмады, дип ата-аналар зур тавыш куптарды”, – диде ул. Сәйдәнең көндәшләрендә дә сизелде бу галәмәтләр. Зурларча ярышып та, җиңә алмаганны күтәрә алмыйча үксеп чыгып китүләре Рамил Гарифуллин әйткән психологик җәрәхәткә ишарә дә инде.

Татарстанның халык артисты Венера Ганиева исә Сәйдә Мөхәммәтҗанованы талантлы һәм үтә чыдам бала дип саный.

– Көчле, чөнки тамыры нык, иманлы, милли җанлы бала. Мин аны гел күзәтеп киләм. Алты яшеннән сәхнәгә менгән, “Йолдызлык” бәйгесенең иң зур бүләген алган бала ул. Аеруча халык җырларын аңлап, көйгә күңелендәгесен салып башкара ала. Мин аңа татар сәнгатенә хезмәт итүче шәхес булыр дигән өметләр юрыйм.

17 апрельдә тапшыруның финалы. Сәйдә Мөхәммәтҗановага уңышлар һәм нык сәламәтлек теләп калабыз.

Гөлинә ГЫЙМАДОВА
Ватаным Татарстан
№ 54 | 14.04.2015

Психолог Рамил Гарифуллин "Голос.Дети" турында: Балалар тапшырулары сексуальлек ягы­на басым ясап ялгыша

Психолог Рамил Гарифуллин "Голос.Дети" турында: Балалар тапшырулары сексуальлек ягына басым ясап ялгыша