07.03.2015 Җәмгыять

Мин улым хакына яшәргә тиеш!

“Нурлат районының Әхмәт авылы кызы 26 яшьлек Айгөл Фазылова ярдәмгә мохтаҗ. Моннан бер ел элек иң якын кешесе – әнисен югалткач, Айгөлнең янәшәсендә бердәнбер юанычы булып ике яшьлек улы Әмир кала. “Әнием үзенең авырганын белмәде дә. Диспансерлаштыру узарга баргач кына күкрәкләрендә ниндидер шеш барлыгын күреп алганнар”, – дип искә ала Айгөл әнисе турында.

Шуннан соң табиблар аны Казанга озата. Ул вакытта аның күкрәгендә икенче стадиядәге яман шеш авыруы булган икән. “Табиблар операциягә кергәнче, химия терапиясе узарга куштылар. Ә әнием дәвалануга барасы көнне бик нык чирләп китте. Ул көнне кинәт башы авырта башлады, күзләре читкә карап, авызы кыегайды. Инсульт булгандыр дип хастаханәгә алып киттеләр. Шулай итеп әнием тиешле вакытта дәвалана алмады. Хастаханәдә ятканда да баш авыртуы кимемәде. Шуннан соң район табиблары әнине тагын Казанга җибәрделәр. Авырту кимемәгәч, башына томография ясаттык. Башында да яман шеш таптылар. Бик нык кайгырды, бетеренде. Ә аннары үлеп тә китте”, – ди ул.

Айгөлнең әтисе моннан 13 ел элек чыгып югалган. “Авырлы икәнемне белгәч, мине дә баланың әтисе ташлап китте. Шуннан соң улым Әмир белән үги әти һәм әнием янына кайтып егылдым. Тик әни вафатыннан соң, үги әти дә безне куып чыгарды. Торыр җирем булмагач, балам белән тегендә-монда йөрдек. Аптырагач, әнинең туганнары янына Казанга килдек. Бер апам миңа бик булыша”, – ди ул.

Әмма кайгы-хәсрәтләр моның белән генә бетмәгән икән әле. “Күптән түгел, күкрәгем авырткач, табибка күренергә бардым. Алар шеш тапты. Тикшерү нәтиҗәсе сөендермәде – миндә дә яман чир бар икән. Аптырагач, ярдәм сорап, “Матери Казани” дигән хәйрия фондына мөрәҗәгать иттем. Алар миңа яшәр урын табып бирде. Бик авыр хәлдә калган кешеләргә фатир биреп торалар икән. Өч бүлмәле ул. Анда балаларыбыз белән өч ялгыз әни яшибез”, – ди ул.

Әлегә Айгөл химия терапиясе курслары уза. Март урталарында соңгысына барам, ди. Ә аннары апрель башында ук күкрәгенә операция ясамакчылар. Әле шушы арада ялгыш егылып, улы да имгәнгән. “Хастаханәгә барганда баламны әниемнең сеңлесе карап тора. Аның да үз гаиләсе. Әмма кулдан килгәнчә ярдәм итә. Әле дә ярый ул бар. Әлегә тормышымда бик авыр вакыт. Шулай да үземдә яшәргә көч таптым. Дусларым да гел күңелне күтәреп тора. Мин улым хакына яшәргә тиеш. Шуңа да начар уйларга бирешәсем килми”, – ди Айгөл.

Авыру булгач, Айгөл эшкә дә йөри алмый. Шуңа күрә мәрхәмәтле кешеләрдән ярдәм сорарга мәҗбүр. Операциядән соң авыртуны баса торган көчле дарулар кирәк икән. Аның бар өмете изге күңелле кешеләрдә.

Ярдәм итәргә теләүчеләр өчен:

Сбербанк картасы номеры – 639002629008718263

Айгөлнең телефоны – 89033419668

---
Ватаным Татарстан
№ --- | 07.03.2015