|
|
Бүген кемнәр туган
|
|
Архив
|
16.02.2015 Җәмгыять
Әфган сугышы корбаныЧирек гасырдан артык вакыт үтсә дә, ул сугышның кайтавазы әле дә кайбер гаиләләрне авыр кичерешләргә этәрә, чөнки интернациональ бурычларын үтәгәндә гарипләнеп кайтучылар да булды, ябык цинк табутлар да аз гына килмәде авылларга. Равил Арифулла улы Хөсәинов та Әфган сугышы корбаны (фотода). Берничә ел элек Уразавыл урта мәктәбендә аның якты истәлегенә мемориаль такта ачтылар. Һәр ел шул датага туры китереп мәктәп укытучылары район социаль яклау бүлеге белән берлектә Хәтер кичәсе оештыра. Менә бүген дә мәктәп коллективы, укучылар, мәрхүм Равилның дуслары, якыннары һәм К.Октябрь районының Әфган сугышы ветераннары чит илдә һәлак булган бу егетне искә алдылар. Равил Арифулла улы Хөсәинов 1965 елның 3 октябрендә Куйсуы авылында туа. Әтисе Арифулла Хөсәин улы һәм әнисе Рабия Атаулла кызы район үзәгенә күченеп, Уразавыл күмәк хуҗалыгында терлекчеләр булып эшлиләр. Биш балалы гаиләдә Равил өлкәне булган. Ул Уразавыл урта мәктәбен тәмамлап, җирле колхозда тракторчы булып хезмәт юлын башлый. Аннары язмыш юллары аны Мәскәү шәһәренә алып китә. Анда профессиональ-техник училищеда слесарь һөнәрен үзләштереп, ЖЭКка эшкә урнаша.
1985 елның май аенда Равилны танк гаскәрләренә хәрби хезмәткә алалар һәм шул ук елның октябрендә интернациональ бурычын үтәргә Әфганстанга озаталар. Ул барча сугышчан заданиеләрне намус белән үти, 20 хәрби операциядә катнаша, яраланып госпитальдә дәвалана. 1986 елның 10 ноябрендә “За отвагу” медаленә тәкъдим ителә, тик егет бу бүләкне алып өлгерми – 22 декабрьдә ул батырларча һәлак була. Танкка боеприпаслар төягән чакта дошман кинәттән безнекеләрне утка тота. Равил югалып калмый, автоматы белән каршы ут ача һәм иптәшләренә танкка кереп качарга боерык бирә. Тирә-якта тынлык урнашуга, Равил беренче булып танктан чыга һәм һич көтмәгәндә дошман пулясы аның яшь гомерен өзә.
Часть командирыннан килгән хатта: “Уважаемые Рабия Атаулловна и Арифулла Хусяинович! Командование и партийная организация войсковой части с глубоким прискорбием сообщают вам, что выполняя свой служебный интернациональный долг на территории ДРА, ваш сын погиб в бою 22 декабря 1986 года. С первых дней службы и до последнего часа он проявлял высокие боевые качества и боевое мастерство, был примером выполнения воинского долга. Боевые друзья Равиля и командование части выражают вам слова глубокой благодарности за достойное воспитание сына и разделяют вместе с вами боль и печаль за постигшее горе”, - дип язылган.
Командование Равил Хөсәиновны үлгәннән соң алып өлгермәгән медале һәм “Кызыл Йолдыз” ордены белән бүләкли. Аны ябык цинк табут белән китереп, Уразавыл зиярәтендә җирлиләр.
Р.РАМАЗАНОВ |
Иң күп укылган
|