14.02.2015 Җәмгыять

Муса Җәлилнең “Моабит дәфтәрләре” халыкка тәкъдим ителә

15 февраль сәгать көндезге 12дә ТР Милли музеенда “Төп нөсхә көне” үткәрелә. Бу көнне Советлар Союзы Герое Муса Җәлилнең фашистлар тоткынлыгында язган “Моабит дәфтәрләре” тамашачылар хозурына чыгарыла. Быел аларны тәкъдим итү чарасында Советлар Союзы Герое, Бөек Ватан сугышы ветераны Борис Кузнецов та катнашыр дип көтелә, диелә ТР Милли музее матбугат хезмәте хәбәрендә.

Тантаналы чараларда ТРның күренекле мәдәният, мәгариф һәм җәмәгать эшлеклеләре чакырулы. Бәйрәмдә Муса Җәлилнең шигырьләре укыла, аның сүзләренә язылган музыкаль композицияләр башкарыла.

“Моабит дәфтәрләре” – Татарстан Республикасы Милли музее фондларында саклана торган кыйммәтле әдәби һәм тарихи истәлек.

Политрук Муса Мостафа улы Җәлилов 1942 нче елның 26 нчы июнендә солдат һәм офицерлар белән чолганыштан чыкканда. Авыр яраланып, аңсыз хәлендә әсирлеккә эләгә. Берлинның Моабит төрмәсендә М.Җәлил Ватанына, туган җиренә, халкына чиксез мәхәббәт белән сугарылган үлемсез шигырьләрен яза. Соңрак ул шигырьләрдән “Моабит дәфтәрләре” җыентыгы төзелә. Күп авырлыкларны җиңеп, туган илебезгә озак еллардан соң кайткан бу үлемсез әсәрләр сугыш һәм тынычлык, үлгәннәр һәм исәннәр, бүгенгебез һәм үткәнебез арасында төп элемтә чыганагы булып тора.

Addnt.ru
№ | 14.02.2015