Вадим Захаров елый-елый ябыга (ФОТО)

Ябыгу – бик үк җиңел процесс түгел. Тик шулай да, ихтыяр көче булганда, уңай нәтиҗәгә ирешергә мөмкин. Менә, җырчы Вадим Захаров та бассейнга йөри башлаган. Анда да үзен җиңә-җиңә!

- Ике атна инде бассейнга йөрим. Җырчы дустым Рөстәм Насыйбуллинга рәхмәт инде. Ул бит мине бассейнга йөрергә күндерде. Аннан соң миндә комплекс дигән нәрсә дә бар. Барганчы: “Ничек соң анда бассейнда? Минем кебек таза гәүдәлеләр йөриме?” - дип сораган идем үзеннән. “Анда синнән дә тазарак гәүдәлеләр йөри”, - дип җавап кайтарды. Абонемент алганда кызык булды. Мине студент дип уйлап, ташламалы абонемент саттылар. Әле яшь күренәм икән, дип күңелдән генә шатланып куйдым. Болай сер бирмәдем (көлә). Беренче көн йөзеп кайткач, икенче көнгә бөтен гәүдә, мускуллар авыртты. Арка да бераз авыртып алды алуын. Аннан соң гәүдә ияләште. Бассейнга йөри башлаганчы авырлыгым 112 килограмм булса, хәзер 106 килограммга калды. Нәтиҗә бар дигән сүз. Яшермим, елый-елый ябыгам (елмая). Бер дә җиңел түгел. Ни дисәң дә, тазаруның чигенә чыктым. Баллы, камыр ризыкларыннан баш тартырга тырышам. Нишләтәсең, гәүдәмне матур формага китерергә вакыт, - диде Вадим Захаров.