17.01.2015 Җәмгыять

12 яшьлек Алия миһербанлы кешеләр ярдәменә мохтаҗ

Казан шәһәрендә яшәүче 12 яшьлек кызчык миһербанлы кешеләр ярдәменә мохтаҗ. “Алия 6 айлык булып туды. “Ашыгыч ярдәм”не тулгак башлану белән чакыртсак та, ул бик озак килми торды. Алар килеп җиткәндә сабыем туа башлаган иде инде”,– дип искә ала кызчыкның әнисе Миләүшә ханым.

– Әле бала тудыру йортына килеп җиткәч тә, бала идәнгә төшмәсен дип, бөтен мускулларымны кысып торырга тырыштым. Шулай булса да, табиблар никтер аны тудырырга ашыкмады. Нәтиҗәдә сабыйның башы кысылган, хәрәкәтләнү өчен җавап бирә торган нерв җепселләренә зыян килгән,– ди ул.

Алия бәләкәй булып тугач, Миләүшә ханым баштарак аның ничек үсүенә артык игътибар итми. Вакытыннан алда туганга, үсеше бераз артка каладыр дип уйлый. Әмма бер яшь тулганда табиблар Алиягә коточкыч диагноз куя. ДЦП һәм күзләренең сукыр булуын әйтәләр. “Бу хакта ишеткәч, башта үземнең дә яшисем килмәде. Аллаһы Тәгаләгә, кызым уенчыкларга карап уйнап утыра торган булсын иде, дип ялвардым. Төннәр буе елый торгач, теләкләрем кабул булды. Чираттагы тикшеренү вакытында бала сукыр дигән диагноз исбатланмады”,– ди ул.

Алияне бик күп табибларга күрсәтеп карыйлар. Казанның күп кенә тернәкләндерү үзәкләрендә, Тула шәһәрендә урнашкан хастаханәдә дә дәвалыйлар. Кызчыкның яшәү теләге көчле була. Ул авыртуларына олыларча түзә, сабыр итә. Аякларына 17 операция ясыйлар. “Алиянең бөтен гомере тоташ көрәштән тора. Тырыша торгач әкренләп хәле яхшыра башлады, ул туры итеп утыра ала, үзе кашык тотып ашый, рәсемнәр ясый, хәтта тотынып басып тора!”– ди Миләүшә ханым.

Алия сигез яше тулганда беренче сыйныфта укый башлый. Дөресрәге, аның янына укытучысы килеп йөри. Әмма кызчыкның башкалар кебек үз иптәшләре янына барып укыйсы килә. Шуңа күрә дә Алиянең ныклап торып аягына басасы килә.

– Дуслар, танышлар киңәше белән Алиянең авыруы турындагы белешмәләрне Кытай клиникаларына җибәрдек. Бер белмәгән кешеләр, эстрада җырчылары ярдәме белән акча җыеп, шунда бару бәхетенә ирештек. Шуннан соң Алиядә үзгәрешләр күзәтелә башлады. Ул әкренләп, карават кырыена тотынып булса да, атлап йөрергә өйрәнде. Озакламый тагын Кытайга барып дәваланмакчы булабыз. Чакыру кәгазен гыйнвар аенда ук алган идек, әмма акча җитмәү сәбәпле, март аенда барырга булдык. Бар ышаныч, өмет киң күңелле кешеләрдә. Кызым авырый башлагач, кайгырып, борчылып йөреп, әниемә дә инсульт булды. Хәзер ул эшли алмый. Миңа гел бала белән утырырга кирәк. Күптән түгел ирем белән дә аерылыштык. Хәзер ике балам, авыру әнием белән ялгызым гына калдым. Улыма – 14 яшь. Аны да укытасы, тәрбиялисе бар. Тик төшенкелеккә бирелмим. Ишегалды җыештырам. Башкача булмый. Әзме-күпме акча эшли алам. Бу авырлыкларны җиңеп чыгарбыз, барысы да әйбәт булыр дип ышанам, – ди Миләүшә.

Алия Бәшировага ярдәм кулы сузарга теләүчеләр өчен реквизитлар:

Получатель: Баширова Миляуша Фаимовна

Банк получатель: Отделение “Банк Татарстан” №8610 г. Казань Счет №42307810562266633201/48

К/Счет: 30101810600000000603

Р/Счет: 30302810862006006226

ИНН: 7707083893

БИК: 049205603, КПП: 165702001

Карта СБЕРБАНКА

Миляуша Баширова

№ 63900262 9009098111

Срок действия 04\16

Элемтә өчен әнисе Миләүшәнең телефон номеры: 89172251631