16.01.2015 Җәмгыять

Илдар Халиковның әтисенең туган авылы турында китап чыкты

Әгерҗе районындагы Балтач авылында хәзер нибары 15ләп кенә хуҗалык калса да, туган авылларына багышланган китапны кулга алу шатлыгын уртаклашырга, төрле якларга таралган авылдашлар, аларның балалары, оныклары кайлардан гына кайтмаган иде.

37 ел гомерен районның мәгариф өлкәсенә багышлаган, шуның 14 елында мәгариф бүлеген җитәкләп зур абруй казанган Шәфкать ага Халиков “Без Балтач Мәмәт нәселеннән“ дигән китабы белән исән чакта үзенә һәйкәл салып калдырды.

Ул 4 сыйныфта укыганда ук туган авылының карта-схемасын төзеп, Балтачның тарихын язуга нигез салып куя. Ә менә 76 яшендә туган Балтачының үткәнен чагылдырган эчтәлекле, фотосурәтләргә бай тарихи истәлек-очерклар китабы нәшер итү хыялы тормышка аша.

Күңелгә аеруча якын, кадерле туган авыллары турында китап язып калдырган авторга Балтач төбәгеннән чыкканнар тирән хөрмәтен, олы рәхмәтен ирештерә.

- Олыгая барган саен туган авыл аеруча газиз була барса да, аның тарихын язуга теләсә кем алына алмый. Моның өчен күпме эзләнергә, өйрәнергә кирәклеген бик яхшы аңлыйбыз, – ди Әгерҗедә яшәүче Зилә Зиннурова. Аның җәмәгате Наил ага Нәбиуллин да хатынының туган төбәген бик ярата. Балтач төбәгенә булган мәхәббәте аның җырларында да чагыла.

Китап авторының да авылдашларына, райондашларга әйтер сүзе бар:

- Бу тарихи китапны язу эшенә аяклы тарихыбыз булырдай авылдашлар исән чакта ук алынасы калган икән. Эшкә бераз соңрак калып керешелде. Шуңа күрә китабымның җитешмәгән якларын үзем дә беләм. Күңелемне иң борчыганы – китапка хөрмәткә лаек авылдашларымның барысын да кертә алмавым. Шуңа күрә бу китапның дәвамы булырга тиеш. Аны мин яза алмам да бәлки. Аны сез – яшьрәк буын дәвам итәргә тиеш. Гомумән, һәр гаиләнең киләчәк буыннарга калырырдай үз гаилә китабы булырга тиеш. Еллар узгач, ул гаилә һәм нәсел тарихын, туган авылыгызның үткәнен өйрәнүдә менә дигән чыганак булачак. Мәсәлән, Менделеевскида яшәүче авылдашыбыз Хәсән ага Сәйфуллин гаиләсенең шундый гаилә китабы бар. Алар ел саен 9 Майда гаиләләре белән җыелып, барлык мәрхүм якыннарын бер минутлык тынлык белән искә алалар. Беребез дә бу дөньяга мәңгелеккә килмәгән. Үзем дә киләчәк буынымның мине әнә шулай искә алуын телим. Шуңа күрә әби-бабаларыгыз исән чакта нәсел шәҗәрәгезне төзеп калырга ашыгыгыз һәм аны оныкларыгыз дәвам итсен иде, – дип мөрәҗәгать итте Шәфкать ага.

Ә Халиковларның нәсел шәҗәрәсе китапта нык тамырлы имән агачы сыман күпләребезгә үрнәк булып тора. Мәгариф ветераннары Шәфкать ага белән Луиза ханымның уллары Татарстан Республикасының Премьер-министры Илдар Халиков та Балтач Мәмәтов нәселенең тугызынчы вәкиле булуы белән, һичшиксез, горурланадыр.

Рәмзия ЗАРИПОВА
Интертат.ру
№ | 16.01.2015