10.12.2014 Милләт

“Ак калфак” ярты елда эшләнгән эшләрен барлый

Безнең Самара өлкәсендә хатын-кызларның “Ак калфак” оешмасы оештырылуга бары алты айлар чамасы гына әле. Шушы кыска вакыт эчендә без шактый гына эшләр башкарырга өлгердек тә инде. Бу хакта күптән түгел Казанда “Ак калфак” Бөтендөнья татар-хатын кызлары оешмасында Самара өлкә бүлеге җитәкчесе буларак миңа һәм урынбасарым Айсылу Әбдеевага хисап тотарга туры килде.

Иң беренче булып берничә урында, мәсәлән, Кошки районының Иске Фәйзулла (Иске Җүрәй), Похвистнево районының Гали авылларында “Ак калфак”ның бүлекчәләрен оештырдык. Алар уңышлы гына эшләп киттеләр һәм берничә кызыклы, файдалы чара да үткәрделәр инде. Иске Фәйзуллада - “Аулак өй”, ә Галидә “Каз өмәсе” бәйрәмнәре уздырылды.

Өлкә бүлегендә дә күп чаралар үткәрелеп тора. Шулардан Рамазан аенда “Розалина” татар кафесында актив хатын-кызларыбыз катнашында зур ифтар мәҗлесе истә калырлык булды. Бу очрашуга ут күршеләребез - Ульян өлкәсенең “Ак калфак” оешмасы әгъзалары да чакырылган иде. Алар безнең белән үзләренең тугызъеллык эш тәҗрибәләрен уртаклаштылар.

Очрашуда мөхтәрәм абыстайларыбыз ислам дине, аның изге гамәлләре турында бик тә матур, аңлаешлы итеп вәгазьләр сөйләделәр. Гаиләдә балаларны ничек тәрбияләү турында да күп нәрсәләр ишетеп белдек.

Самараның Киров мәйданындагы Мәдәният сараенда үткәрелгән көзге уңыш -“Сөмбелә” бәйрәме хакында аерым әйтеп үтәсем килә. Аны оештыруга безнең “Ак калфак” бүлекчәсе үзеннән зур өлеш кертте. Милли татар ашлары һәм борынгы чигү-тегү әйберләре күргәзмәләре тамашачыда зур кызыксыну уятты. Аккалфаклылар чакыруы буенча шәһәребезнең “Алтын инә”, “Мәдинә” милли киемнәр тегү ательелары да бәйрәмгә килеп, үзләренең эш үрнәкләрен күрсәттеләр.

“Розалина” татар кафесында Чәкчәк бәйрәме дә уңышлы узды, дисәм дә була.

Гомумән, кафебызда мондый бәйрәмнәр, очрашулар соңгы вакытларда ешая төште. Соңгы көннәрдә генә биредә “Ак калфак” оешмасы хатын-кызлары Мәскәү телевидениесенең “Мусульмане” тапшыруын алып баручы журналист Динара ханым Садретдинова белән очраштылар.

Казанда үткәрелгән семинар барышында Бөтендөнья хатын-кызларының “Ак калфак” оешмасы җитәкчесе Кадрия ханым Идрисова безне барлык региональ һәм җирле милли-мәдәни оешмалары, хакимият органнары, дин әһелләре белән берлектә эшләргә чакырды. Без шулай эшләргә тырышабыз да инде. Бигрәк тә Бөтендөнья татар конгрессы башкарма комитеты бюросы әгъзасы, региональ “Дуслык” иҗади-иҗтимагый җәмгыяте президенты Фәхретдин әфәнде Канюкаевның ярдәме өчен без аңа бик тә рәхмәтлебез.

Киләсе, 2015 ел Россиядә Әдәбият елы итеп билгеләнәчәк. Шуны истә тотып без “Гаиләдә һәм җәмгыятьтә - хатын-кыз” темасына кыска әдәби әсәрләр – хикәяләр һәм җирле рәссамнар конкурсын уздырырга планлаштырабыз. Моның өчен иҗат кешеләрен барлау, аларны хезмәттәшлеккә тарту кирәк булачак. Татар хатын-кызларының кул эшләре традицияләрен торгызуга да игътибар бирәчәкбез.

“Ак калфак” әгъзалары Сөмбелә бәйрәмендә.

Римма НУРЕТДИНОВА фотосурәте

Разия ӘЮПОВА
Бердәмлек
№ 49 |