Бер төркем каләм ияләреннән АЧЫК ХАТ

Хөрмәтле укучыларыбыз, әдәбият сөючеләр!

 

Һәммәбез дә шаһит, матбугатыбыз басмаларын халыкка тарату елдан-ел кыенлаша бара. Моның бүгенге заман үзгәрешләренә бәйле, каләм әһелләреннән генә тормаган җитди сәбәпләре барын сез үзегез дә яхшы беләсез. Әмма без, сәбәпләрне ачыклаудан, акланудан бигрәк, иң әүвәл мондый хәлдән бергәләп чыгу юлларын эзләргә тиешбез. Мәсьәлә үтә кискен тора: сүз туган телебезне саклап калу һәм үстерү турында бара. Ә тел, мәгълүм булганча, милләтне милләт иткән төп билге, төп күрсәткеч. Телнең хуҗасы һәм сакчысы – сез, ягъни халык, бигрәк тә аның үз тарихын белгән, киләчәге хакында уйланган зыялы катламы. Телнең яшәү даирәсе – гаилә, мәктәп, хезмәт-эш урыннары, сәхнә-театрлар, тамаша-концерт заллары, сәүдә-базар рәтләре... Әмма затлы классик телнең нигезе-бишеге – ул әдәбият һәм матбугат. Халыкның гасырлар буе жыйналып, чарланып килгән асыл җәүһәрләрен алардан башка күзаллап булмый. Менә шуңа күрә сүз сәнгатенең төп мәйданы булган, телебез сагында торган газета-журналларыбызны саклыйсы, үстерәсе иде. Әлеге басмалар сезгә инде күптәннән таныш. Алар – яшәешебез көзгесе буларак, әдәбият-мәдәният тормышын үзәккә алып яктыртучы һәм халкыбызның рухи мирасын барлаучы "Казан утлары", "Идел", "Мәйдан", "Безнең мирас" журналлары, "Мәдәни җомга" атналык газетасы; күпкырлы тәрбия эшен милли традицияләр җирлегендә алып барырга ярдәм итүче "Сөембикә", "Мәгариф", "Гаилә һәм мәктәп" журналлары; сәнгатьле сүз аша яшь варисларыбызда кече яшьтән телебезгә мәхәббәт уятырга омтылучы "Ялкын", "Сабантуй", "Салават күпере" журналлары, "Көмеш кыңгырау" газетасы һ.б. Болар арасында гасырларга сузылган зур тарихлы басмалар да бар. Дистә миллионга якын  халык  өчен  бүгенге  тиражлар  һич  тә  канәгатьләнерлек түгел.

 

Алгарышыбыз өчен кирәкле газета-журналларны үзебезнең татар дөньясына мөмкин кадәр күбрәк тарату бурычын, әлбәттә, редакция хезмәткәрләре көче белән генә үтәп чыгып булмый. Сезнең дә, хөрмәтле укучыларыбыз, гомумхәлне аңлап, бу үтә мөһим һәм саваплы эштә актив катнашуыгыз сорала. Теләгәндә һәм чынлап торып тотынганда, сез дә әлеге басмаларга яхшы ук булыша алыр идегез. Үзегез яшәгән төбәктәге халыкка хезмәттәшләрегезгә, туганнарыгызга, дусларыгыз-танышларыгызга аңлатып мөрәҗәгать итсәгез икән. Безнең күпсанлы, төрле буын язучылары, татар теле һәм әдәбияты укытучылары мондый игелекле эштә һичшиксез катнашырга бурычлы. Алар үзләре генә дә берничә данә яздырта алса да, милли басмаларыбызның тиражы шактый ишәер иде. Халкыбызның дәвамчылары булган яшьләр дә бу хәрәкәттән читтә калырга тиеш түгел. Хәзергә кадәр тупланып килгән бай рухи мирас аларның киләчәге өчен бит. Биниһая зур мөмкинлекләргә ия Интернет челтәреннән тыш, безнең язма матбугатта да яшь буынның аң-зиһенен баетырлык төрледән-төрле мәгълүматлар, танып-белү офыкларын киңәйтерлек мәкаләләр, рухи-эстетик тәрбия алырлык әсәрләр даими рәвештә чыгып тора. Бу җәһәттән бүгенге яшьләргә, шул исәптән яшь каләм ияләренә мөрәҗәгать итеп, шуны да искәртәсе килә: яшь дусларыбыз, республика газета-журналларын үзегез дә укып барырга тырышыгыз; татар басмаларын әти-әниләрегезгә, абый-апаларыгызга, якын кардәшләрегезгә туган көннәр, Яңа ел һ.б. бәйрәмнәр уңаеннан үзенчәлекле бүләк рәвешендә дә яздырта аласыз. Шул ук вакытта аерым предприятиеләр, акционерлык җәмгыятьләре, эшмәкәрлек белән шөгыльләнүче оешмалар, фермер хуҗалыклары да Уңыш бәйрәме, 8 Март, Сабан туе, Республика көне тантаналарында хезмәт алдынгыларына газета-журналларга язылу квитанцияләрен бүләк итүне оештырсыннар иде.

 

Милли матбугаттан башка заманның мәдәни югарылыгына ирешеп булмый. Бездән хәзер, телебез, милләтебез киләчәге хакына зур җаваплылык тойган хәлдә, бердәм һәм бербөтен булып, газета-журналларыбызны саклап калу, моның өчен җыйнаулашып тырышлык кую таләп ителә!

 

Шунысын да исегезгә төшерәбез: көндәлек матбугатка барлык элемтә бүлекләрендә,  шулай ук дәүләт хезмәте порталында (http://usluqi.tatarstan.ru) "ТАТМЕДИА" ААҖ сайты аша (http://tatmedia.ru) он-лайн режимында электрон рәвештә язылырга мөмкин.