22.09.2014 Шоу-бизнес
Нияз Җәләлов тавышсыз калган
Татар шоу-бизнесына соңарып кына кергән автор-башкаручы Нияз Җәләлов бүгенге көндә тамашачыларның яраткан җырчысына әверелде. Профессиональ сәхнәгә чыгуына ике ел гына булуына карамастан, тамашачы күңелен тиз яулады.
Быел җырчы беренче мәртәбә бер көнен дә калдырмыйча ураза тоткан. Хәзер җырчының Корбан бәйрәменә әзерләнеп йөргән чагы. Балалары Алия белән Булатка атап чалдырганы булган. Шулай ук җырчы ел саен корбан чалдырып, ятим балалар йортына илтә икән. Быел да бу саваплы эшне башкарырга теләвен яшермәде.
Җырчы “Риза булырсыңмы?” исемле быелгы сезон концертларын уңышлы гына башлап җибәрде. Бу араларда ул иҗат төркеме белән Норлатта, Яңа Чишмәдә, Чистайда концертлар биреп килгән. Шуннан соң Мөслимдә туйда чыгыш ясаган. Икенче көнгә үк Питрәчкә юбилей үткәрергә китеп, бөтенләй тавышсыз калган. Җитмәсә, кичә Нияз Җәләлов “Болгар” радиосындагы “Шөпшә шоу” тапшыруында туры эфирда иде. Эфирга килер алдыннан җырчы тавышны җайлату өчен гадәттәге махсус ысулын кулланган. Моның өчен ул бер кашык үсемлек мае алып, шуны тамагында тоткан. Аннан соң инде тамагы йомшарып, тавышы рәтләнгән.
– Кичә мине туры эфирга чакырганнар иде. Бик күңелле булды. Үзем мишәр булгангамы, мине мишәрләр бик ярата (көлә). Мишәрләр яшәгән һәрбер районнан шалтыратып иҗатыма дәрт бирделәр. Иҗатымны бик үк өнәп бетермәгән бер радиотыңлаучы да булды. Әйтергә кирәк, ул танылган кеше. Исемен әйтеп тормыйм инде. “Сез бит профессиональ җырчы түгел. Музыкаль белемегез юк. Бу өлкәдә укырга җыенмыйсызмы? Нишләп концертларыгызда халык җырларын башкармыйсыз?” кебек сораулар да бирде. Тагын кабатлап әйтәм: укырга бер дә соң түгел. Укырмын. Исәнлек кенә булсын. Халык җырларына килгәндә, минем җырларымны тамашачы үзе халык җырлары дәрәҗәсенә менгерде. Аллага шөкер, мине бар җирдә дә зал тутырып каршы алар. Беркайчанда оешмаларга билетларымны сатканым булмады. Билетларымны бары касса аша гына сатып бетерәм. Тамашачы мине ярата икән – әле иҗат итәсе дә итәсе. Барлык җырларымның көен үзем язам. Башка авторлар белән дә эшлим. Аллаһы Тәгалә тавышны гына алмасын дигән теләктә калам. Чөнки берничә көн элек тавышым бөтенләй беткән иде, — диде Нияз Җәләлов.
1
2