Авыллар ярминкәгә киләләр, шәһәрләр белми кала

Узган шимбә көнендә Агропромпаркта узган яр­минкәдә сатып алучылар күп түгел иде. “Иртәнге 2-3тә торып, әзерләнеп киләбез. Ризыкларны кире алып кайтырга мәҗбүрбез. Шәһәр халкы безнең килүне белми. Инде төш җитеп килә, бик аз саттык”, – дип үпкәләрен белдерде авылдан килү­челәр. Аларны аңларга була. Әзерләнеп килгәч, сатасылары, халыкка хезмәт күр­сәтәселәре килә.

 

– Монда ярминкә барганлыгын белмәдем дә, – ди Сания Ибраһимова. – Кирәк әйберләрне эчтән алдым бит. Кеше нигә бу якта йөри икән дип чыксам, ярминкә бара. Авылдан килүчеләрдә бәя арзанрак шул. Шәһәр эчләренә белдерү такталары урнаштырсалар да булыр иде. Белсәң, юл уңаеннан да кереп чыгарга була.

 

Базарда бәрәңгенең бер килограммы – 15, суган – 20, кишер – 20, чөгендер – 20-25 сум булса, ярминкәдә алар шактый арзанрак. Бәрәңгене – 10-11, суганны – 13-15, чөгендер-кишер – 15, шикәр комын 29 сумнан кайсы базарда табарга була соң?! “Шикәр комыгыз бигрәк арзан. Кибетләрдә аның бәясе 40 сумга якынлашты, дип килеп әйтәләр. Шактый саттык. Кеше күп килгән булса, күптән чират торып алып бетерерләр иде”, – ди Зәйдән кадәр килеп шикәр комы сатучы ханым.

 

Ярминкәләр Казанның 7 урынында һәр шимбә саен 27 декабрьгә кадәр дәвам итәчәк әле. Ә менә 14 сентябрь көнендә исә сату урыннары тагын да күбрәк булачак. Казан шәһәренең икътисадый үсеш комитеты рәисе Илдар Шакиров бел­дер­гәнчә, ул көнне 50 урында сәүдә нокталары эш­ләячәк. “Авиатөзелеш һәм Яңа Савинда – 11, Киров һәм Мәскәү – 9, Вахитов һәм Идел буе – 28, Совет районнарында 2 урында узачак”, – ди Илдар Шакиров.

 

Бәяләр арту һәм ассортимент мәсьәләсенә кагылышлы мәсьәләләргә ачыклык кертү өчен Авыл хуҗалыгы һәм азык-төлек министрлыгында “кайнар телефон” номерлары эшли. Сорауларны 8 (843) 221-76-21 (23, 24) телефоннары аша дүшәмбе-пәнҗешәмбе көннәрендә – 8.00-17.00 сәг., җомга көнне 8.00-15.45 сәгатькә кадәр би­рергә була. Министрлык­ның матбугат үзәге хәбәр иткән­чә, төрле эчтәлектәге сораулар белән шалтыратучылар бар икән. “Кайберләренә шун­дук җа­вап бирәбез, бел­гечләр бе­лән дә тоташтырабыз. Без­гә мөрәҗәгать ит­кәндә җи­теш­терүченең кем икән­леген ачыклап шалтыратсыннар иде. Товар җитеш­терүчене белми торып, ни сә­бәпле бәя күтә­релүен ачык­лый һәм аңлата алмыйбыз”, – ди матбугат сәркатибе Гөл­нирә Абдрахманова.

 

 

Россиягә кайбер төр ризык­лар чит илләрдән кертелми башлагач, ил җитәк­челеге тө­бәк­ләргә бәяне ныклы күзәтү астына алырга киңәш итте. Әлеге уңай­дан республикада махсус штаб төзел­де. Белгеч­ләр сәүдә нокталарында булып, бәя­ләрнең тотрыклылыгын тик­шерә. Тү­бәндәге таблицада Казан шәһәрендә урнашкан сәүдә нокталарындагы ур­тача бәя күрсәтелә. Авыл ху­җалыгы һәм азык-төлек ми­нистр­лы­гының азык-төлек базары үсе­ше бүле­геннән алынган бу мәгълү­матларда ризык­лар­­ның уртача хакы һәм алар­ның ел ­башыннан бү­генгәчә күп­мегә артуы яки кимүе бәян ителә.