Фотограф Шамил Абдюшев шәхси күргәзмә оештыра

7 август көнне 16.00 сәгатьтә Татарстанның Халыклар дуслыгы йортында танылган фотограф Шамил Абдюшевның шәхси күргәзмәсе ачыла. Әлеге күргәзмә Шамил аганың 65 яшьлеге уңаеннан “Татмедиа” агентлыгы ярдәме белән оештырыла.

Шамил Абдюшев Казанда 1949 елда дөньяга килә. Казан дәүләт университетын 1987 елда тәмамлый. 2008 елда Татарстан журналистларының “Бәллүр каләм” премиясенә лаек дип табыла, берничә мәртәбә иң яхшы спорт фоторепортеры титулына ия була.

Фотографның беренче шәхси күргәзмәсе дә нәкъ менә спорт темасына багышланган иде. Коллегабыз Шамил абый Казанның иң тырыш фотографларыннан санала. Эшен һәрвакыт җиренә җиткереп, профессиональ башкара торганнардан ул.

“Минем беренче шәхси күргәзмәм 60 яшьлек юбилеема багышланган иде. Дусларым еш кына: “Нишләп фото күргәзмәләр сирәк оештырасың?” дип сорыйлар. Мин - репотер, нәфис фотография белән шөгыльләнәсем килми. Дуслык йортында ачыла торган күргәзмәгә 100дән артык хезмәтемне тупладым. Темасы ягыннан алар төрле булды. Биредә дәүләт кешеләре, сәясәтчеләрнең кызыклы ракурста мәңгеләштергән фотолары белән бергә спорт ярышларында төшерелгән, Миңгәр сабан туеннан фотоларны күрергә мөмкин”, - ди юбиляр фотограф.

Абдюшевның хезмәтләре «Правда», «Вечерняя Казань», «Республика Татарстан», «Труд», «Татарстан яшьләре», «Мәдәни җомга», «Казанские ведомости», «Известия Татарстана», «Ватаным Татарстан», «Шәһри Казан», «Интертат.ру» электрон газеталары аша халыкка таныла.