ТӘБӘ

Грекча йомырка тәбәсе

5 йомырка, 2 аш кашыгы вакланган әстерхан чикләвеге, 2 аш кашыгы бодай оны, 3 аш кашыгы үсемлек мае, 2 аш кашыгы ваклап туралган петрушка, 1 стакан сөт яки сөт өсте, ярты бал кашыгы тоз

Тирән эчле савытка йомырка ватып салабыз. Чикләвек, он, тоз өстибез, миксер йә кашык белән әйбәтләп туглыйбыз. Сөт яки сөт өсте өстәп, тагын бер тапкыр туглыйбыз. Газны яндырып, табаны утка куябыз. Табага үсемлек мае салабыз. Май кызгач, газны сүндереп, газ мичен яндырабыз. Әзер катнашманы кайнар табага салабыз да мичкә куябыз. Тәбәне өсте кызарганчы, 15—20 минут пешерәбез һәм, мичтән алып, өлешләргә бүләбез. Тәбә өстенә петрушка сибәбез.

Французча кыздырылган йомырка тәбәсе

5 йомырка, 100 г каты сыр, 2 аш кашыгы вак итеп туралган укроп, 1/3 бал кашыгы тоз, пычак очында кара борыч

Йомырканы ватып, тирән эчле савытка салабыз, ваклап туралган укроп, тоз, борыч өстибез. Әйбәтләп миксер йә кашык белән туглыйбыз. Газны яндырабыз, үсемлек мае салынган табаны утка куябыз. Таба җылынгач, әзер катнашманы табага салабыз. Сырны угыч аша уабыз. Йомырканың бер ягы пешкәч, уртасына уылган сырны салабыз. Аннан тәбәне төргәк итеп төрәбез дә кыздырып алабыз. Табадан сак кына алып, 5 өлешкә кисәбез һәм тәлинкәләргә салабыз. Әзер тәбәне кайнар килеш табынга бирәбез.

Бәрәңге белән укроплы йомырка тәбәсе

5 йомырка, 2 бәрәңге, 4 аш кашыгы сөт, 3 аш кашыгы атланмай, ярты стакан сөт өсте, 1 аш кашыгы вак итеп туралган укроп, ярты бал кашыгы тоз

Бәрәңгене әрчеп, чиста итеп юабыз. Зур булмаган кәстрүлгә 1 стакан кайнар су салып, тоз өстибез һәм бәрәңге салабыз. Газны яндырып, бәрәңгене пешереп алабыз. Кайнар бәрәңгене, суын саркытып, иләк аша уабыз. Бу боламыкка сөт һәм әйбәтләп тугланган йомырка өстибез. Тагын барысын бергә әйбәтләп болгатабыз, тоз салабыз. Газ мичен яндырабыз. Атланмай белән майланган кекс формасына әлеге катнашманы салабыз да газ миченә куябыз. Өсте матур булып кызарганчы, 15—20 минут пешерәбез. Әзер тәбәне, мичтән алып, өлешләргә бүләбез һәм тәлинкәләргә салабыз. Ваклап туралган укропны, сөт өсте белән туглап, тәбә янына бирәбез.

Кыздырылган йомырка тәбәсе

5 йомырка, 1 аш кашыгы атланмай, 1/3 бал кашыгы тоз, петрушка, укроп, суган кыягы

Газны яндырып, табага май салабыз да утка куябыз. Май эрегәч, утны киметеп, сак кына ватып йомырка салабыз. Өстенә тоз сибәбез. Әкрен утта агы катыланганчы пешерәбез. Пешеп җиткәч, өстенә вак итеп туралган петрушка, укроп, суган сибәбез.

Сырлы тәбә

150 г каты сыр, 5 йомырка, тулыр-тулмас 1 стакан сөт яки сөт өсте, 4 аш кашыгы консервланган яшел борчак, 3 аш кашыгы үсемлек мае, ярты бал кашыгы тоз

Вак угыч аша сыр уабыз. Тирән эчле савытка йомырканы ватып салабыз, тоз, уылган сыр өстибез һәм туглыйбыз. Савытка сөт яки сөт өстен әкрен генә өсти барып, миксер йә кашык белән болгатабыз. Табаны, май белән майлап, газда җылытабыз һәм, яшел борчак өстәп, әзер катнашманы табага салабыз. Газ мичен яндырабыз. Табаны мичкә куеп, тәбә өсте кызарганчы, 15—20 минут пешерәбез. Мичне сүндерәбез. Тәбә әзер булгач, табаны сак кына алабыз. Тәбәне, тәлинкәләргә бүлеп, кайнар килеш табынга куябыз.