СКАНЕР

Бер караганда, ул — принтерның киресе. Принтер компьютердагы электрон документларны кәгазь битенә бастырып чыгара. Ә сканер, киресенчә, кәгазь битендәге сурәт яки текстны компьютер хәтеренә кертә. Сканер — редакция хезмәткәрләре, дизайнерлар, видеомонтажлаучылар һәм башка кайбер һөнәр ияләре өчен алыштыргысыз җиһаз. Ул гади мәктәп укучысы өчен дә файдалы була ала. Әйтик, сканер ярдәмендә компьютерга лекцияне кертергә мөмкин. Ә махсус «Fine Reader» программасы китап битенең күчермәсеннән электрон текст ясар. Фотосурәтеңне компьютерга кертәсе булсаң да, сканер кирәк. Аннары бу рәсем белән теләсә нәрсә эшләргә була. Телисең икән, дустыңа электрон почта аша җибәр, теләсәң, виртуаль чәчтарашханәдә үзеңә индеецларныкы кебек прическа ясап куй.

Компьютерга кертеләсе рәсем сканерның яссы ягына куела. Өстән җайлы гына итеп капкачын ябасың. Күпчелек сканерлар белән эш итү тәртибе шулай. Гадәти сканер А4 форматлы кәгазьгә яраклаштырылган (А3леләре дә бар). Мондый аппаратта зур рәсемнәрне өлешләп сканерлыйлар да соңыннан компьютерда «ябыштыралар». Моны махсус программа башкара.

Сканерны сайлаганда, аның оптикасына игътибар итәргә кирәк. Белгечләр әйтүенчә, бу элементтан күп нәрсә тора: рәсемнең сыйфаты да, җиһазның хезмәт итү дәвамлылыгы да. Тагын бер үзенчәлек — сканерлау тизлеге. Һәр җиһаз төрлечә эшли. Иң җитез сканерлар бер минут эчендә 80 битне компьютерга кертә алса, иң озак кыймылдаганы минутына 1—2 битне генә эшкәртә ала. Сканерлар берничә төрле була: барабанлы, планшетлы, портатив һ. б. Бу җиһазга компьютер кибетләрендә әллә ни кытлык юк. Принтерлар күпме булса, сканерлар да шулкадәр үк.