ГАДЖЕТЛАР

Гаджет — электрон уенчык. Теләсә кайсы электрон җайланманы гаджет дип атарга була: компьютер, ноутбук, кәрәзле телефон, CD-плеер, смартфон һ.б. Беләсегез килсә, мондый җайланмаларга бәйлелек авыруга әверелергә мөмкин икән. Кешеләр яңа приборларны бернинди нигезсез, кирәксә-кирәкмәсә дә сатып алалар, ә алар белән эшләү чын мәгънәсендә маниягә әйләнә. Европада бу авырудан инде берничә миллион кеше интегә, ди, ә яңа технологияләр үсеш алган саен, гаджет-аддикация дип аталган бу эпидемия бик киң масштабларны яулап алачак, дип уйлыйлар белгечләр.

Гаджет-бәйлелекнең симптомнары:

• прибор белән эшләгәндә, үзеңне бик яхшы хис итәсең,
• җайланманы куеп тора алмыйсың,
• яңа «уенчык» алу өчен, барын да эшлисең,
• җайланманы файдалануга киткән чыгымнар сине кызыксындырмый,
. һаман саен озаграк прибордан аерыла алмыйсың,
. прибор булмаса, үзеңне начар хис итәсең, яңа гаджет алмасаң, депрессиягә чумасың,
. дусларың һәм гаиләңнең кирәге калмый,
. ялганга чорналасың, якыннарың алдында үзеңне гаепле хис итә башлыйсың,
. укуда һәм эштә бер өем проблемалар килеп чыга.

Әле ул гына да түгел,
. кулның нерв күзәнәкләре дә борчыла башлый,
. күзләр кибә,
. баш авырта,
. йокының рәте китә.

Әгәр менә шул хәлләр синең белән була-нитә калса, тиз генә болай эшлә:
. гаджет белән көненә бер сәгатьтән артык эшләмә,
. яңа уенчык алудан бөтенләй баш тартып торырга кирәк,
. әгәр гаджет белән «аралашырга» теләсәң, дустыңа шалтыратып ал, урамга чыгып кер,
. дусларыңны ешрак кунакка чакыр.