ФОРУМ

Форум сүзен ишеткәч, иң элек пөхтә киенгән җитди йөзле кешеләр күз алдына килә. Алар ниндидер мөһим мәсьәләләр буенча фикер алышалар сыман. Интернет дөньясында шулай ук форум төшенчәсе еш кулланыла. Аны күп кенә сайтларда очратырга мөмкин.

Реаль һәм виртуаль форумнар формалары буенча төрле булсалар да, аларның эчтәлекләре бер үк. Тегендә дә, монда да кешеләр аралаша. Интернет-форум шул ягы белән уңайлы: компьютерчыларга бер урынга җыеласы юк. Кемнең нинди киемнән һәм нинди чырай белән форумда катнашуы мөһим түгел. Алар бит компьютер артында утыралар! Шуңа карамастан виртуаль форумның һәр катнашучысы теге яки бу темага карата үз фикерен әйтә ала.

Еш кына кешеләр форумда таныша, фикердәшләрен таба. Соңыннан бу танышу реаль тормышка да күчәргә мөмкин. Дөрес, ызгышып, талашып китүчеләр дә юк түгел. Һәр форумның үзенең хуҗасы була. Шул хуҗа кеше әңгәмәнең матур гына баруын, ызгыш-талашсыз үтүен тәэмин итә. Күп кенә форумнарда сүгенергә, яла ягарга, янарга ярамау турында кисәтү бар. Әгәр мондый очраклар булса, сайтның хуҗасы ямьсез язуларны тиз арада юк итә.

Гадәттә, форум билгеле бер тема буенча була. Аны сайтның хуҗасы да, башка бер кулланучы да башлап җибәрә ала. Икенче кеше моңа карата үз фикерен язып калдыра. Шулай итеп, чып-чын форум килеп чыга. Кайсыбер форумнарда смайликлар куллану мөмкинлеге дә бар. Алар аралашуны тагын да җанлырак итә.

Интернетта сайтларның иге-чиге юк, дигән идек. Ни белән кызыксынасың? Автомобильләр беләнме? Әллә чигәргә яратасыңмы? Интернетта син, һичшиксез, үзеңә кирәкле сайтны таба алачаксың. Күп очракта анда форум да була.