БЕЛЕН

1 кг белен камыры өчен: 350 г бодай оны, 2 йомырка, 450 г сөт йә сөт өсте, 100 г май, 30—35 г чүпрә, 20—30 г шикәр комы, 10 г тоз

Беленне әче (чүпрәле) һәм төче камырдан пешерергә мөм-кин. Әче камырдан пешерү өчен сөтне йә сөт өстен 30 градуска кадәр җылытабыз, чүпрә, тоз, шикәр комы өстәп, йомырка сытып, яхшылап болгатабыз. Аннары иләнгән онны әзләп салып, төере калмаслык итеп болгатабыз. Камыр өскә күтәрелгәнче, җылы урынга куеп торабыз.

Төче камырны югарыда язылганча, тик чүпрәсез әзерлиләр.

Белен пешерү өчен тирән булмаган, саплы кечерәк таба җайлы. Кызган майлы табаны, сабыннан күтәреп, камырны җәеп җибәрәбез. Тиешенчә җәелсен өчен, табаны бераз селкетеп торырга кирәк. Пешеп җиткәч, табаны әйләндереп, беленне тактага салабыз һәм өстенә тастымал каплап торабыз. Бераздан беленне майлый барып, тәлинкәгә өябез. Эрегән май йә каймак белән беленне табынга бирәбез.

Күпертелгән сөт өсте белән белен

Камыр өчен: 8 г чүпрә, 500 г он, 1 аш кашыгы үсемлек мае, 1 аш кашыгы шикәр комы, бер чеметем тоз, 1 л сөт, 6 йо-мырка, 1 г ванилин;

эчлек (крем-шанти) өчен: 200 г сөт өсте, 1 г ванилин, 100 г шикәр комы; шоколадлы соус өчен: 200 г шоколад, 100 г сөт өсте

Чүпрәне 1 стакан җылы сөттә эретеп, 10 минутка җылы урынга куеп торабыз. Тирән эчле савытка сөт, үсемлек мае, шикәр комы, тоз, ванилин һәм ватып йомырка салабыз, он, чүпрә өстәп крем кебек куерганчы болгатабыз. Камырны дымлы тукыма белән каплап, 1 сәгатькә җылы урынга куябыз. Шул арада эчлек әзерлибез. Сөт өстен шикәр комы һәм ванилин белән крем куелыгына кергәнче күпертәбез. Кайнар сулы савытта шоколадны эретеп, шуңа алдан ясалган кремны кушабыз. Кызган майлы табага ярты стакан камырны агызып пешерәбез. Камырның кырыйлары җиңелчә генә күтәрелә башлагач, беленнең икенче ягын әйләндерәбез. Әзер беленгә крем ягабыз һәм рулет итеп төрәбез. Беленнәрне тәлинкәләргә куеп, өстенә шоколадлы соус агызып, кайнар килеш табынга куябыз.