|
|
Бүген кемнәр туган
|
|
Архив
|
05.12.2008 Шоу-бизнес
КАЗАНДА «ТАТАРЛАР» ДИСКОТЕКАСЫ АЧЫЛАТатар милләтенең үзәге булган Казан каласында яшьләр тормышы һәрвакыт кайнап тора. Менә күптән түгел башкалада янә бер вакыйга турында мәгълүмат таралды – яшьләр өчен «Татарлар» дип аталган яңа дискотека ачыла икән. Моңа кадәр кайбер татар егетләре һәм кызлары Зөлфәт Зиннуровның «Күңел», «Курай» радиосының «Чәк-чәк» һ.б. дискотекаларында күңел ача иде, хәзер исә аларның тагын бер барыр, очрашып аралашыр урыны булачак.
«Татарлар» дискотекасын оештыру идеясе белән милләт җанлы бер төркем егетләр чыккан. Алар арасында - татар яшьләренең «Шәрык» клубы президиумы рәисе, Бөтендөнья татар яшьләре форумы бюросы рәисе урынбасары Мансур Кашапов, КДУ аспиранты Тәлгать Кабанбай һәм «Яланаяклы кыз» фильмында Самат ролендә уйнаган егет Руслан Сафин бар. Алар татар дискотекаларын Казанның «Пирамида» мәдәни-күңел ачу комплексында үткәрергә ризалык алган.
«Татарлар» дискотекасының максаты — яшьләрне татар көйләренә якынайту һәм нәфис сүз сәнгатен үстерү. Хәер, моны коры дискотека гына дип тә әйтергә ярамыйдыр, чөнки ул татар яшьләренең күңел ачу кичәсе булырга дәгъва итә. Биредә татарча КВН, татар халык һәм шәрык биюләре, кызыклы уеннар, яшь җырчылардан музыкаль күчтәнәчләр һәм бик күп бүләкләр булыр дип көтелә. Тәүге дискотека танылган «Шәрык» клубы оешуының 102 еллыгына багышланачак. Шуңа күрә бу чараны «Шәрык» клубы проекты дияргә дә мөмкин.
«Өлкәннәр татар яшьләренең төнге клубларга йөрүен өнәп бетерми: алар анда спиртлы эчемлекләр кулланып, бозыклыкка өйрәнә, диләр. Чынлыкта да андый куркыныч бар. Шуңа күрә без киләчәктә «Пирамида»дагы барда спиртлы эчемлекләр сатуны тыярга телибез», - ди Мансур Кашапов.
Шулай итеп, «Татарлар» дискотекасының беренче кичәсе 17 декабрьдә «Пирамида»да узачак. Дискотеканы бу өлкәдә биш еллык тәҗрибәсе булган Илдус Закиров алып барачак. Кичәгә килүчеләрне ди-джей LILU һәм ди-джей Данила биетәчәк. ИлГәрәй, IDELIA, T & В (татарча рэп), ALQANAT, Диана Таҗетдинова искиткеч шәп җырларын, Илмира Гатиятуллина гаҗәеп шәрык биюләрен бүләк итәчәк, КДУның татар филологиясе факультеты «Кәеф» командасы татарча КВН чыгышларын күрсәтәчәк. Кичәнең кунаклары - җырчы Илназ Сафиуллин, ISMAIL һәм «Рәхәт лукум» төркеме.
Дискотека кичке сәгать 9да башланачак. Керү бәясе: алдан алынган билет - 150 сум, 17се көнне «Пирамида» кассасыннан алганда — 200 сум торачак. Чараның мәгълүмати иганәчеләре: «Кәеф ничек?», «Безнең гәҗит» газетлары һәм «Intertat.ru» электрон газетасы. Дискотекага килүчеләргә истәлекле бүләкләр тапшырылачак. Шулай ук «Intertat.ru» газетыннан да сюрприз әзерләнә.
Шунысын әйтергә кирәк: киләчәктәге дискотекалар өчен кызыклы темалар тәкъдим итәргә теләүчеләр булса, алар 17се көнне «Татарлар»га бушка керә алачак. Моның өчен тиз арада яңа дискотекага үзенчәлекле тема уйлап, аны info@intertat.ru адресына язып юлларга кирәк, җиңүчене ике билет көтә.
Эльвира ШАКИРОВА |
Иң күп укылган
|