24.05.2014 Матбугат

«Сөембикә» журналының 100 еллык юбилееннан ФОТОрепортаж

«Сөембикә» журналының 100 еллык юбилее 16 майда тантаналы бәйрәм кичәсе булып Г. Камал исемендәге театрда узды. Елмаюлар, җырлар, чәчәкләр, ихлас сүзләр... Шыгрым тулы зал редакция ветераннарын, журнал авторларын һәм хезмәткәрләрен, II Бөтендөнья татар хатын-кызлары форумында катнашучыларны, юбилярны котларга килгән мәртәбәле кунакларны бергә җыйган иде.

Юбилей тантанасын Татарстан Дәүләт Советы Рәисе Фәрит Мөхәммәтшин ачып җибәрде журнал тарихына күз салып, аның татар хатын-кызларын – милләт аналарын һәрьяклап тәрбияләүдәге роленә тукталып, хатын-кызларыбызның татар телендә нәшер ителүче бердәнбер басмасы булган «Сөембикә» журналын югары бәяләде, иҗади уңышлар теләде. Парламент җитәкчесе Фәрит Хәйрулла улы Республикабызның беренче Президенты Минтимер Шәймиевнең дә котлавын ирештерде. Аннары ул редакция журналистларына хөкүмәт бүләкләре, Мактау грамоталары, Рәхмәт хатлары тапшырды. Татарстан Президенты каршындагы мәдәнияткә ярдәм итү фонды рәисе Нурия Һашимова редакциягә сертификат тапшырды. «Алмаз-холдинг» зәркән эшләнмәләр оешмасының генераль директоры Фәрит Гомәров «Сөембикә» хезмәткәрләренең һәркайсына көмеш бизәнү әйберләре өләште. Бөтендөнья татар конгрессы Башкарма комитеты рәисе Ринат Закиров котлау сүзендә Сөембикә исемен йөртүче хатын-кызлар журналын чын мәгънәсендә милләтебезнең йөзек кашы дип атады.

Милләт файдасына зур эшләр башкарган хатын-кызларга көмеш беләзек тапшыру – редакциянең «Ак калфак» татар хатын-кызлар оешмасы белән берлектә башкара торган гамәле – Тантананың матур бер мизгеле иде. Журналист Филисә Хәкимова, Финляндиядә яшәүче милләтпәрвәр Хәмидә Чайдам, «Сөембикә варислары» фестиваль-проектының авторы җырчы Гөлзадә Сафиуллина «Сөембикә беләзеге» иясе булдылар.

«Журналның 100 еллык юбилее – ул гасырга бер туры килә торган олы бәйрәм. «Сөембикә» тарихының бер гасырлык томын ябып, яңа битен ачабыз. «Сөембикә» исемен кире кайтарганда басмабыз милләт аналары тәрбияләүне максат итеп ала. Без дә бу максаттан тайпылмыйбыз», – ди журналның баш мөхәррире Ләйсән Юнысова.

Әйе, гасыр бәйрәме булып күңелләргә уелып калды «Сөембикә» юбилее. Җырчылар Венера Ганиева, Зәйнәп Фәрхетдинова, Рөстәм Закиров, Алинә Шәрипҗанова, Азат Нургалиев, Базарбай Бикчәнтәев, Казакъстаннан Майра Мөхәммәт кызы, Рәсим Ильясов җитәкчелегендәге «Казан нуры» ансамбле, «Казан» бию һәм Татар дәүләт җыр һәм бию ансамбльләре чыгышы йөзьяшәр япь-яшь «Сөембикә» кичәсен тагын да ямьләде.