Каравонга “Буран әбиләре” дә киләчәк

Республика халыкларының күп гасырлы традицияләре арасында "Каравон" бәйрәме аерым урын биләп тора. “Каравон” рус мәдәниятенең төрлелеген, байлыгын, аның тирән тарихи тамырларга ия икәнен күрсәтә.

25 май көнне Лаеш районы Никольское авылында ХХII Россиякүләм "Каравон" фольклор бәйрәме оештырыла. Мәгълүм булганча, элек-электән, язгы кыр эшләре тәмамланганнан соң биредә тирә-яктан кунаклар җыелган, кешеләр әйлән-бәйлән-каравоннарда әйләнгән. Хәзерге көндә "Каравон" Россиякүләм рус фольклор фестивале дәрәҗәсендә оештырыла. Бирегә Татарстаннан гына түгел, ә Россиянең төрле төбәкләреннән сәнгатькәрләр җыела. Халык коллективлары килеп үз осталыкларын күрсәтә.

Проектны оештыручылар хәбәр иткәнчә, "Каравон" Татарстанда этникара тынычлык һәм бердәмлеккә, мәдәниятләрнең үзара тәэсир итешүенә ярдәм итә. Шулай ук республикабыздагы күп милләтле халкыбызны, яшьләрне халыклар дуслыгы, Ватанга мәхәббәт рухында тәрбияләүдә зур роль уный.

Татарстан мәдәният министрлыгының матбугат үзәге хәбәр иткәнчә, сәнгать коллективлары арасында “Буран әбиләре” ( “Бурановские бабушки”) ансамбле телгә алына. Удмурт артистлары “Каравон” фестиваленең төп сәхнәсендә чыгыш ясаячак.

Татарстанда рус мәдәниятенең визит карточкасына әверелгән фестивальнең һәр ел саен катнашучылары һәм тамашачылары арта бара. Узган ел “Каравон” үз тирәсенә 15 мең кеше җыйган иде. Быел исә, Россиядән - 7, Татарстаннан 115 сәнгать коллективлары катнашыр дип көтелә.