Кыям бабай – хатын-кыз түгел!

Кызык заманда яшибез, җәмәгать.Тормышта якын туганнардан мирас булып калган мал-мөлкәт, фатир яки йорт-мазарны үзеңә рәсмиләштерә башласаң, күрмәгәнеңне күрәсең икән. Ярты гасыр элек Спас районы Иске Рәҗәп авылыннан Казанга күчеп килгән якташым бу юлда икенче елын йөри икән инде. Алда исә тагын берничә суд буласы әле, ди.

Барысына да күп еллар элек дөрес итеп тутырылмаган документлар сәбәпче. Бер ата-ана балаларының бишесендә биш төрле фамилия! Кайсы Нуретдинов, кайсы Нуртдинов яки Нурдинов дип язылган. Авылы­бызның исеме дә бер документта “Старый Баран”, икенчесендә Старый Рязяп, өченчесендә – Иске Рәҗәп дип язганнар. Фа­ми­лияләрендә генә түгел, исем­нәрендә дә шыр хата. Таныклыктагы “әти-әнисе” дигән графада бары тик исем-фамилияләре генә куелган булуы бер хәл. Өлкән абыйларының әтисен ни өчендер “Нуритдинов Кыям Хәбибула кызы”на әйләндер­гәннәр. Мәрхүм бабай шул “таныклык” белән унҗиде ел элек фани дөньядан китеп барса да, бүген туганнарның чыннан да бертуганнар икәнлеген раслар өчен дөрес документ кирәк.

Хәер, үземә һәм туганнарыма да кайчандыр кемнеңдер игътибарсызлыгымы яки наданлыгымы аркасында документларны дөрес тутырмаганнары өчен шактый борчу-мәшәкатьләр аша үтәргә туры килде. Шул ук “Туу турында таныклык”тагы төгәл­сезлек, хаталарны санап бетерерлек түгел. Шәхси документларны, шул исәптән паспорт, хезмәт кенәгәсе, хәрби билет, дип­лом һәм башка рәсми кәгазь­ләрне тутырганда барлык мәгъ­лүмат нәкъ менә шушы танык­лыктан алынганга, аларны бер төрле итәр өчен никадәрле бусага таптарга туры килгәнен санап тормыйм. Хикмәт анда түгел.Төрле документлар тутырылганда татарча исем-фамилияләрдә, авыл исемнәрендә хаталар һа­ман да очрый тора. Аннары кем­нәрнеңдер ваемсызлыгы, игътибарсызлыгы, ахыр килеп наданлыгы аркасында бер гөнаһ­сызларга авырга туры килә. Мондый хәлгә чик куяр өчен документ тутыручыларның җавап­лылыгын арттыру чаралары, шул исәптән татарча исемнәр, авыл һәм районнарның дөрес язылышын чагылдырган китаплар булдырырга вакыт җиткәндер, шәт.