Бала туу гаиләнең матди хәлен начарлатамы?

Россиялеләрнең күбесе хатын-кыз карьера турында түгел, ә гаиләсе һәм якыннары турында уйларга тиеш, дип саный. Ә гүзәл зат эш урынында күтәрелү турында онытмаска тиеш дигән фикер белән күбесенчә баласыз гаилә әгъзалары килешә.

Россиякүләм иҗтимагый фикерне өйрәнү үзәге оештырган сораштыру нәтиҗәләренә караганда, Россиядә гомер итүче халыкның 72 проценты хатын-кыз үзенең хезмәт урынын һәрвакыт икенче планга калдырырга тиеш, дип саный. Аның төп бурычы – гаиләсе, ире, балалары турында кайгырту.

Әйтергә кирәк, бу фикер белән килешүчеләрнең күбесе авылда гомер итүче (76%) һәм өлкән яшьтәге (77%) кешеләр. Әлеге сүзләр белән килешүче яшьләр дә шактый. Аларның 64 проценты гүзәл затлар беренче урынга һәрвакыт гаиләне куярга тиеш, дип саный.

Россиялеләр гаиләдә бала тууның хезмәт урыны белән ни дәрәҗәдә бәйле булуы турында да үз уй-фикерләрен җиткергән. Бактың исә, сораштырылучыларның 45 проценты әлеге шатлыклы вакыйга ата-ананың карьера баскычы буенча күтәрелүенә тискәре йогынты ясый, дип саный икән. Ә халыкның 48 проценты, киресенчә, бу фикер белән килешми.

Шунысы да бар, россиялеләрнең 53 проценты гаиләдә бала туу семьяның матди хәленә зыян китерә дигән фикердә тора.