“Өметләре алданган спорт фанаткасының такмаклары”

Сочида Олимпиада тәмамлану көе безнең редакциягә “Өметләре алданган спорт фанаткасының такмаклары” дигән хат килеп иреште. Без аны ничек бар – шулай сезгә дә тәкъдим итәргә булдык. Автор исем-фамилиясенең баш хәрефләрен генә куйган булса да, такмакларның көн кадагына туры килүе кызык.

Тарих ике мең ундүрттә
Олимпиада көттек.
Сочины күтәрер өчен,
Күпме көч, акча түктек!

Россия спортчыларына
Чын күңелдән ышандык.
Һәр алынган урын өчен,
Балалардай шатландык.

Көн уза да, төн уза,
Яңа йолдызлар туа.
Тик аларның арасында
Безнекеләр аз була.

Бөтен эшләремне ташлап,
Олимпиада карыйм.
Медаль көтеп үтә көнем,
Медаль безгә юк тагын.

Иртәгә уен дигәндә
Команданы җыйдылар.
НХЛ йолдызлары
Зур планнар кордылар.

Аренага чыгып басты
Хоккейның йолдызлары.
Бозга килеп керү белән
Югалды балкышлары.

Уңга карасам да – юк,
Сулга карасам да – юк.
Биатлонда, хоккейларда
Урысларга ход та юк.

Фигуристларыбыз гына
Өметләрне аклады.
Өч алтын, берәр көмеш
Һәм бакырны яулады.

Алай да безгә нужа,
Болай да безгә нужа.
Уңнан – кытай, сулдан – поляк,
Барысы да безне уза.

Бергер китте узынып,
Кар бураны туздырып.
Безнекеләр егылып калды,
Чаңгыларын сындырып.

Норвег кызлары бик җитез
Чаңгыда йөгерделәр.
Ә безнекеләр финишка
Мәскәү аша килделәр.

Әле ярый Аннар килеп,
Медальләр алыштылар.
Корея россияннары
Шунда да булыштылар.

Бу такмаклар килеп чыкты
Йөрәк янганга гына.
Шундый бай, батыр илебез
Артка калганга гына.

Ә шулай да без – фанатлар,
Өметләрне өзмибез.
Киләчәктә илем өчен
Яңа үрләр күзлибез.

Уразавыл.