КАЗАН УРАМНАРЫНДА НЛО КАРГА ТҮГӘРӘКЛӘР СЫЗА? (ФОТО)

Казанның Даурский урамындагы 20нче йорт ишегалдында кар өстендә түгәрәк сырлар барлыкка килгән. Бу эзләр Казан фотографы Шамил Абдюшев төшергән фотолардан яхшы күренә.

Сырларны карга якын-тирәдә яшәүче бала-чага сызганмы, әллә инде бу берәр аномаль хәлме? 20нче йортта яшәүче Валентина ханым Павлова ишегалдында шундый ук сырларны үзенең тәрәзәсеннән 2007 елның ноябрендә дә күргән. Ул чакта да урамда үскән каен төбеннән кар өстендә тип-тигез итеп түгәрәкләр сызылган булган. Үткән шимбәдә исә ул гадәттәгечә эте Даринаны ияртеп, урамга һава суларга чыккач янә шушы сырларга юлыккан.

Әлеге сызыкларның килеп чыгышын метро төзелешенә бәйләп, туфракта тирбәнүләр, тетрәүләр барлыкка килгәндер дип уйлаучылар бар. Әйтик, Даурский урамы яныннан метроның “Әмәт” станциясе җир асты юлы уза. Тик 1990 елда, әле ул чакта метро төзелеше турында сүз дә булмаганда, Казанның 9нчы шәһәр хастаханәсе бакчасында да карда шундый ук сызыкларны күрү очраклары теркәлгән.

Сәер күренешнең сәбәбе ишегалдында үскән әлеге дә баягы каен агачында түгелме икән? Моңа каршы “Казан-Космопоиск” төбәк төркеме белгече, уфолог Мария Петрова “Вечерняя Казань” газетына сөйләгәнчә, 2007 елда шундый ук түгәрәк эзләр Екатеринбург шәһәрендә күзәтелгән. Андагы урында, мәсәлән, бернинди, шул исәптән каен агачы да үсмәгән. Мондый түгәрәк сызыклар соңгы елларда Россиядә бик еш күренә башлады, ди Мария Петрова. “Бәлки бала-чага кроссовка киеп, карга сызыклар сызгандыр. Кроссовкадан бит табан эзе калмый диярлек”, - ди ул. Шуңа да карамастан, уфологлар кардагы түгәрәкләрне НЛО галәмәте түгеме икән дигән уйны да кире какмый.