Россия беренчелегендә өченче

Яшь буынны дөрес тәрбияләү – иң актуаль проблема. Бала мәктәптә вакытта укытучылар күз алдында, ә мәктәптән соң, әти-әниләре эштә чакта үзе үзенә хуҗа.

Шуны истә тотып, моннан өч ел элек Түбән Новгород өлкәсе Сергач районы Грибан авылының мәдәният йортында билбаулар белән көрәш түгәрәге эшли башлады. Атнага берничә тапкыр Грибан, Камка, Шөбиле авыллары егетләре шунда җыелып көрәш алымнарын өйрәнәләр, осталыкларын үстерәләр. Һәм, әйтергә кирәк, югары дәрәҗәле ярышларда призлы урыннар яулап, районның абруен күтәрәләр. Өч ел эчендә район, өлкә, хәтта Бөтенроссия чемпионатларында да призерларыбыз байтак булды.

Мәсәлән, Грибан егете, Кнәген инженер-экономика институты студенты Камил ГАФУРОВ шушы көннәрдә Чиләбедә узган билбаулар белән көрәш буенча Россия беренчелегендә үз авырлыгында (55 кг) өченче урын яулап кайтты. Институтта Камил ирекле көрәш белән дә актив шөгыльләнә. Үткән елда Арзамаста узган бу спорт төре буенча өлкә чемпионатында призлы урынга лаек булды.

Иң мөһиме, районнан ярдәм бар. Булмаса, боларны үз көчебез белән генә булдыра алмас идек, әлбәттә. Шуның өчен, беренче чиратта, безгә ярдәм кулы сузган Сергач районы администрациясе башлыгы Н.Субботинга, «Лидер» ФСКсы директоры Н.Ерамасовка, Камка һәм Шөбиле мәктәпләре директорлары Рафаиль Әбүбәкировка һәм Арсланбек Аляутдиновка, Рбишчадан ике туган Садековларга, Шөбиленең ОРТ хуҗалыгы җитәкчесе Фаил Арифуллинга олы рәхмәтләремне белдерәм.

Камил ШӘЙМӘРДАНОВ, Сергач районының билбаулар белән көрәш командасы тренеры.