Ата-аналар митингка әзерләнә

Киләсе елдан балалар бакчасы өчен түләү арту турындагы хәбәрләр бөтен республика халкын хафага салды. Төрле шәһәрләрдә бу карар белән килешмәүче ата-аналар каршылык чараларына әзерләнә. Әйтик, 26 октябрь көнне Чаллыда, 3 ноябрьдә Казанда митинг узачак. Шулай ук Түбән Кама, Әлмәт, Зәй һәм Алабуга халкы да үз ризасызлыгын белдерергә ниятли.

Бүген “Гаилә һәм мәктәп” журналы ата-аналарда борчу уяткан мәсьәлә буенча фикер алышу оештырды. "Түгәрәк өстәл"дә активист ата-аналар, Татарстан мәгариф һәм фән министрлыгы, Хезмәт, халыкны эш белән тәэмин итү һәм социаль яклау министрлыгы, Казан мәгариф идарәсе вәкилләре катнашты.

Татарстан мәгариф һәм фән министрының беренче урынбасары Данил Мостафин ата-аналарны тынычландырырга тырышып, үзгәрешләр буенча аңлатмалар бирде. Аның сүзләренә караганда, киләсе елның 1нче гыйнварыннан мәктәпкәчә белем бирү учреждениеләре өчен түләү икеләтә түгел, ә 70 процентка артачак. Әмма хәзер ата-аналарга бирелә торган федераль компенсациягә төбәк субсидиясе өстәлгәч, бу үсеш алай ук югары булмаячак, дип белдерде ул.

Республиканың Хезмәт, халыкны эш белән тәэмин итү һәм социаль яклау министрлыгының социаль яклау чаралары методологиясе буенча бүлек җитәкчесе Елена Зенина исәпләп күрсәткәнчә, кеше башына 10 мең сумнан кимрәк керемле гаиләләр өчен балалар бакчасына түләү нибары 300-500 сумга гына артачак. Димәк, ата-аналар бюджетына бу үсеш йогынтысы зур булмаячак, дип ышандырырга тырыша ул.

Әмма ата-аналарны бу аңлатмалар барыбер канәгатьләндермәде.

- Балалар бакчасы өчен түләүне арттыруга без барыбер каршы. Һәм бу карарны юкка чыгару өчен бөтен көчебезне куячакбыз. Интернетта петицияне 1000нән артык кеше имзалады инде. Шулай ук Казанның төрле районнарында да имзалар җыябыз. Башка шәһәрләрдә дә бу юнәлешләрдә актив эшлиләр. Түрәләребез өстәмә субсидия вәгъдә итеп тынычландырырга тырыша. Әмма бу ярдәм бар кешегә дә тиешле түгел. Әйтик, рәсми рәвештә эшләмәгән ата-аналарга ярдәмгә өметләнәсе юк. Ә мондый гаиләләр меңнәрчә. 3 ноябрьдә Бауман урамында митинг уздыруга рөхсәт алынды инде. Һәм без үз ниятебездән кире кайтмаячакбыз, - дип белдерде “Без Казан шәһәрендә балалар бакчалары өчен түләү артуга каршы” төркеме активисты Наталья Шмыгова.