Медицина түләүлегә әйләнерме?

Дәүләт каешларны кысыбрак бәйләргә куша, киләсе елга бюджетны кыс­картыпмы-кыскарта­лар. Бу сәламәтлек саклау өлкәсенә дә кагыла. Тиешле акча булмаса, медицина хезмәтенә бәяләр артачак дигән шик бар. Медицина хезмәте бушлай күрсәтелә дип саналса да, чынында аның киресе булуы күпләргә мәгълүм.

Россиянең пациентлар бер­ләшмәсе җитәкчесе Юрий Жулев медицина өлкәсенә җитәрлек акча бүленмәсә, тү­ләүле хезмәтләр артачак дип саный. “Хастаханәгә эләккән кеше бүген дә күп хезмәткә үз кесәсеннән түли. Түләүле медицина хезмәтләре тагын да артса, кешеләр дәвалана алмаячак. Төбәкләрдә “бюджетта акча юк” дигән сылтау белән, дәүләт гарантиясенә кергән хезмәтләр өчен дә акча тү­ләттерә башлаячаклар”, – дип әйтте ул.

Моңа кадәр РФ сәламәтлек саклау министры Вероника Скворцова, медицина түләү­ле­гә әйләнмәячәк, дип белдергән иде. Моны ул РФ Консти­ту­циясендәге “һәр кешенең бушлай медицина хезмәтенә хокукы бар” дигән сүзләр белән куәтләде.

Җәмәгать эшлеклесе, Татарстан Дәүләт Советының элеккеге депутаты Сүрия Усманова, кешеләрне түләүле ме­дицина хезмәтеннән файдаланырга мәҗбүр итәләр, дип саный. “Әкренләп медицина тү­ләүлегә әйләнеп бара. Яңа законнар хастаханәләргә акча эш­ләргә мөмкинлекләр ачты, берни эшләтеп булмый. Бер генә мисал: ортопед кирәк, РКБга юллама алдым. Бардым, ләкин табибка язылу юк, ди­деләр. Түләүле белгечкә керә аласыз, дип киңәш бирәләр. Әгәр кеше анда керә икән, аннары рентгенны да, башка тик­шеренүне дә акчага ясатасы була. Ә авылдан килеп белгеч­кә эләгергә телә­гән кеше ниш­ләсен?! Ул түләргә мәҗбүр. Медицина бушлай бул­сын өчен күп акча ки­рәк, Россия хө­кү­мәте моңа акча бүләр­гә ашык­мый”, – диде Сүрия ханым.