Балалар агуланганмы, әллә?..

Татарстанда балалар белән бәйле тагын үлем-җитем бар. Республиканың тикшерү органнары хәбәр итүенчә, башкаланың Дәрвишләр бистәсендә урнашкан балалар интернат-йортында йогышлы авырулар аркасында ике бала үлгән. Ә Сәламәтлек саклау министрлыгы бер генә баланың үлүе турында әйтә.

Үлемнең сәбәбе: сары су авыруыннан (водянка) булырга мөмкин дип баралар. Йөрәге җиткелекле эшләмәгән, ике яклы үпкә ялкынсынуыннан терелә алмаган диючеләр дә бар. Әмма әлегә кистереп җавап бирүче юк.

Балалар үлеме һәм авыруы турындагы күңелсез яңалык­лар Россиядә Бала хокукларын яклау буенча вә­каләтле вәкил Павел Астаховка да барып ирешкән. Ул Татарстан Президенты Рөс­тәм Миңнеха­новка бу вакыйганы тикшерү­не үз контро­ленә алуны сорап мөрәҗәгать иткән иде. 30 сентябрьдә кинәт хәл­ләре начарланган, эче авырткан 20 баланы Республика йогышлы авырулар клиник хас­таханә­сенә ките­рәләр. Беренче диагноз – тирән сулыш юллары вируслы инфекциясе (ОРВИ) һәм эче китү очрагы дип карала. Кичә шул җәһәттән сәла­мәтлек саклау министры урынбасары Сергей Осипов журналистларга соңгы мәгъ­лүмат­ларны җиткерде:

– Йогышлы авырулар хаста­ханәсендә әлеге интернат-йорттан 27 бала дәвалана. Балаларның икесе бүген ките­релгән. 5 бала реанимациядә ята. Балаларга куелган диагноз – уртача дәрәҗәдәге эчәк­лек инфекциясе.

Хезмәт, эш белән тәэмин итү һәм социаль яклау министр­лыгы матбугат үзәге җитәкчесе Рафаэль Гыйниятуллин исә балалар йортында йогышсызландыру эшләре алып барылуын, карантин игълан ителүен, барлык хезмәткәрләрнең дә медицина тикшерүе узуын хәбәр итте. Cоңгы нәтиҗәне гистологик тикшерүләрдән соң Тикшерү комитеты әйтәчәк.