Машинаңнан колак кагасың килмәсә, штрафыңны түлә

Республикада юл йөрү кагыйдәләрен бозган өчен штрафы булган 140 меңгә якын машина йөртүче исәпләнә. Татарстанның баш суд приставы Радик Ильясов аларга тизрәк әлеге бурычларыннан «котылырга» киңәш итә.

20 августтан башлап юл йөрү кагыйдәләрен бозарга «яратучы», ә менә штрафларын вакытында түләргә ашыкмаучы машина хуҗаларына көн бетә. Татарстанның суд приставлары идарәсе бурычлы йөртүчеләр белән көрәшнең яңа ысулын тапкан.

Бурычлыларны камера күзәтә

Татарстан Президенты Рөстәм Миңнехановның ярдәме белән Татарстанның суд приставлары идарәсенә «Юл приставы» дип атала торган 7 җайланма кайтарылган. Аларның эш принцибы юл кырыендагы машина тизлеген билгеләүче камераларныкын хәтерләтә. Төп аерма - әлеге җиһазлар машинаның номеры аша аның хуҗасының бурычлымы-юкмы икәнлеген билгели.

Тәфсилләбрәк аңлатсак, юлдагы полиция постлары тирәсенә махсус камералар урнаштырыла. Алар һәрбер машинаны күзәтеп, номерын язып бара. Әлеге  номер исә ЮХИДИ идарәсе һәм салым инспекциясенең мәгълүматлар базасы аша тикшерелә. Әгәр дә машина хуҗасының бурычы барлыгы ачыкланса, система махсус сигнал бирә һәм экранда автомобиль турында барлык мәгълүмат күрсәтелә.

Штраф урынына - машина

Машина хуҗасының түләнмәгән штрафлары барлыгы ачыкланса, ул полиция хезмәткәрләре тарафыннан туктатыла. Әгәр дә штраф бәясе машина бәясе белән тәңгәл килсә яки артып китсә, автомобиль дәүләт карамагына күчә. Әгәр дә бурыч бәясе азрак, мәсәлән, 500 сум гына икән, автомобильнең берәр җиһазы  (навигатор, запас тәгәрмәч һ.б.) полиция хезмәткәрләре тарафыннан алып калына. Шунысы да бар, тели икән - машина йөртүче штрафын урында ук түли ала.

Әлеге яңалык турында журналистларга Хөкүмәт йортында узган брифингта Татарстанның баш суд приставы Радик Ильясов сөйләде. Аның сүзләренә караганда, хәзерге вакытта әлеге җайланмаларны урнаштыру һәм шушы  система белән бәйле тиешле мәгълүматларны җыю эшчәнлеге бара.

Татарстан юлларына әлеге төр җайланмаларны урнаштыру юкка түгел билгеле. Камералар бурычлы автомобиль хуҗаларын тизрәк эзләп табарга ярдәм итәчәк. Бу исә, үз чиратында, республика бюджетын тулыландыруда да зур роль уйный.