Татар кызы – иң чибәре

25-31 июль көннәрендә Грузиянең Батуми шәһәрендә балалар арасында VIII Халыкара матурлык бәйгесе уздырылды. Анда 11 яшьлек Казан кызы Сабира Китаева иң югары дәрәҗәдәге «Little miss Universe» («Дөньяның кечкенә миссы») исемен яулап кайтты.

9 август көнне дөньяның кечкенә гүзәле Татарстан журналистлары белән очрашып, үзенең хис-кичерешләре белән уртаклашты. «Татмедиа» матбугат һәм массакүләм коммуникацияләр агентлыгында узган чарада кызның әнисе Энҗе Китаева һәм «Мисс Татарстан» иҗтимагый оешмасы президенты Изольда Сахарова да катнашты.

«Мин әлеге бәйгегә бик озак әзерләндем. Конкурста җиңү яулавыма бик шатмын. Грузия дә миңа бик ошады. Мин анда яңа дуслар таптым, чит ил кызлары белән инглиз телендә аралаштым. Араларында башка телләрдә сөйләшүчеләре дә бар иде. Мин кызларны татар теленә өйрәттем, ә алар мине үз телләрендәге сүзләр белән таныштырды», - дип сөйләде Сабира Китаева журналистларга.

Кызның әнисе Энҗе ханым исә кызы белән чын-чынлап горурлануын билгеләп үтте. «Сабира бик тә хезмәт сөючән бала. Тик әлеге җиңүне аның гына тырышлыгы дип әйтеп булмый. Берничә ай дәвамында аның белән көчле педагоглар, берсеннән-берсе сәләтлерәк профессионаллар эшләде», - диде Энҗе Китаева.

Әйтергә кирәк, чарада АКШ, Бразилия, Украина, Непал, Әрмәнстан һәм башка илләрдән 4-15 яшьлек бик күп кызлар катнашкан. Шулар арасыннан бары тик безнең Сабира Китаева гына жюри әгъзаларын таң калдыруга ирешкән.

Ә менә Изольда Сахарова сүзләренә караганда, әлеге җиңү Татарстан өчен традицион. «Җәй айларында, кагыйдә буларак, төрле халыкара матурлык конкурслар чоры башлана. Нинди генә бәйге булмасын, берсендә дә призлы урыннар яуламый кайткан юк», - дип белдерде җитәкче үзенең чыгышында. Аның әйтүенчә, матурлык бәйгеләрендә катнашуның төп максаты - модель әзерләү түгел, ә балаларга ачылырга, үз-үзләрен камилләштерергә ярдәм итү.

Шунысын да билгеләп узу кирәк, Сабираның матурлык бәйгесендә беренче мәртәбә генә катнашуы түгел. 2012 елда ул яшь модель һәм талантлар арасында уздырылган халыкара форумда «Модель» номинациясендә алтын медаль яулаган булган. Быел исә «Татарстанның мини-мисс» титулына лаек дип табылган. Кызчык «Балалар төп-моделе» бәйгесендә җиңү яулавы белән дә горурлана.