Әти-әнигә – ике процент (Сораштыру)

Дәүләт Думасында өлкәннәргә ярдәм итүнең яңа юлларын эзлиләр. Пенсионерлар партиясе лидеры Игорь Зотов әзерләгән закон проектында эшләгән кешеләрнең хезмәт хакыннан ай саен ике проценты күләмендә сумманы тотып барырга һәм бу акчаны әти-әнисенең пенсиясенә өстәргә тәкъдим ителә.

Әлеге документның канун буларак кабул ителәсен фаразлавы кыенрак, әмма инде хәзердән үк мондый тәкъдим зур бәхәсләр уятты. Беренчедән, ике процент күләмендәге акча нәрсәне үзгәртәчәк? Икенчедән, балалары әти-әниләренә ярдәм итсен өчен аерым закон кирәкме?

Диләрә Вафина,“Моя газета. Татарстан” газетасының баш мөхәррире:

– Кешегә лаеклы пенсия түләү дәүләтнең төп вазыйфаларыннан берсе санала. Минем үземә әлеге закон проекты сәер тоелды. Чөн­ки аны тормышка ашырганда бик күп проблемалар килеп чыгачак. Бездә бит төп проблема пенсиянең кечке­нә булуыннан гыйбарәт. Эш бала­ларның ярдәм итү-ит­мә­вендә генә түгел. Нормаль гаиләләрдә алар болай да әти-әниләрен ташламый. Инде өлкәннәргә булышырга мәҗбүр итәләр икән, моны күзәтеп тору өчен махсус орган кирәк булачак. Тик алимент түләү кебек проблема килеп чык­масмы? Шуңа күрә өл­кән яшьтәгеләрнең тормышын яхшырту өчен, иң мөһиме, пенсияне арттырырга ки­рәк. Инде закон проекты кабул ителгән оч­ракта да, миңа калса, пен­сионер­лар­ның 99 проценты балаларыннан акча басып калуга каршы булачак. Хәтта балалары аларга яр­дәм итүдән баш тарткан очракта да. Чөнки алар һәрвакыт әти-әни булып кала. Хәтта картлар йортына тапшырылган кайбер кешеләрнең дә балаларына ярдәм итү өчен акча җыеп барганнарын ишет­кә­нем бар.

Елена Полякова,Россия Пенсия фонды­ның Татарстандагы идарә­сенең пенсия­ләрне бил­геләү һәм исәпләү бүлеге белгече:

– Миңа калса, һәркем үзенең әти-әнисенә ярдәм итәргә тиеш. Моның өчен аерым закон кирәкми. Инде дәүләт мине бу эшкә махсус закон белән мәҗ­бүр итәргә җыена икән, моны үземне кимсетү дип кабул итәм. Миңа калса, ярдәм итү яки итмәү һәр кешенең намус эше. Бездә әти-әниләргә гомер-го­мер­гә ярдәм ит­кәннәр. Инде кемдер бу кагыйдәне үтәми икән, ул закон кабул ителгән очракта да, аннан качу юлларын табарга тырышачак. Әйтик, керем­нәрен азрак күрсәтеп. Монысы гаилә кыйммәтлә­ре юкка чыгып баруын раслый. Әти-әниләр безне үс­тергән һәм алар моның әҗерен күрергә тиеш. Шу­ңа күрә, миңа калса, әлеге закон проекты мәсьәләне хәл итү юлы була алмый. Күпләр аны үзләрен ким­сетү буларак кабул итәргә мөмкин.

Ләйсән Рәхимова,Камал театры актрисасы, Татарстанның атказанган артисты:

– Дәүләт олы яшьтәге кешеләрне балалары өсте­нә калдырмакчы була тү­гелме соң бу? Дөресен әйт­кәндә, соравыгыз кызыклы һәм уйландыра торган булды әле. Чөнки әлегә кадәр әти-әнигә балалары ярдәм итәргә тиеш һәм барысы да шулай эшлидер дип уйлый идем. Димәк, алай түгел икән. Инде мондый закон әти-әниләрен бар дип тә белмәгән кешеләрне нәрсәдер эшләргә мәҗбүр итәчәк икән, аның зыяны юк. Әмма моның белән генә ни эшләп булыр? Ул ике процент күпме генә файда китерер икән соң?

Рөстәм Идрисов,булачак пенсионер:

– Мондый закон проекты безнең барып терәлгә­не­безне генә раслый. Ди­мәк, ата – улны, ана кызны белми торган заманага килеп җиткәнбез. Монысы бер. Инде икенче яктан карасак, бу документ нәрсәне үзгәртә соң? Күп­челек халык әти-әнисен бо­лай да язмыш кочагына ташламый. Шуңа күрә алар­га мондый закон ки­рәкми дә. Әмма әти-әнисен картлар йортына илтеп аткан ке­шегә барыбер. Ялгышмасам, алардан болай да ниндидер алимент тү­ләт­терергә була. Үтиләрме – анысы инде икенче мәсьә­лә. Шуңа күрә бу закон проектының файдасын күр­мим, ул бары тик без­нең җәмгыятькә диагноз гына куячак. Анысы болай да билгеле инде.