Депутатлар ирекле базар оештырырга тәкъдим итә

Һәр кешенең өендә кирәксезгә әйләнгән әйберләр байтак. Әмма аларның башка берәүгә кирәк булуы ихтимал. Депутатлар шундый әйберләрне сату өчен елга бер мәртәбә ирекле базар оештырырга тәкъдим итә. Бу хактагы закон проекты Дәүләт Думасына юлланган инде.

“Зур базар” көнен август­ның ахыргы шимбәсенә бил­геләргә ниятлиләр. Бу көнне Россиядә яшәүче һәркем үзе­нә кирәк булмаган, әмма кулланырга яраклы булган көн­дәлек куллану товарларын сата алачак. Сату урынын бил­геләү җирле хакимият органнарына йөкләнә. Халык сату урыны өчен дә, башка салымнар да түләмәячәк. Моннан тыш, депутатлар ирекле базарда өй шартларында җитеште­релгән азык-төлек сатуны да рөхсәт итәргә җыена. Бу – аз керемле россиялеләр өчен кесә калынайту өчен бик әйбәт мөм­кинлек булыр иде, ди алар. Әмма дәүләт теркәве узар­га тиеш булган һәм Россиядә куллану тыелган товарларны сатарга рөхсәт ителмәячәк. Шунысы да бар: мондый базарда сатылган товарларга кулланучылар хокукларын яклаучы законның катнашы юк. Нәрсә сатып алуы өчен һәркем үзе җавап би­рәчәк.

“Күпчелек илләрдә, Париж, Нью-Йорк кебек шәһәрләрдә мондый базарлар бар. Анда иске әйберләр, китаплар, сән­гать әсәрләре дә сатыла. Борынгы әйберләрне яратучылар анда теләп йөри. Россиядә дә бу гадәт барлыкка килсә, яхшы булачак”, – ди бәйсез социаль сәясәт институтының тө­бәк программалары директоры Наталья Зубаревич. Әмма аның фикеренчә, борынгы әйберләр, сәнгать әсәрләре белән беррәттән иске кием-салым, азык-төлек сату урынсыз. Ә Югары икътисад мәк­тәбе белгече Георгий Остапкович мондый базарлар ел әйләнәсе оештырылырга тиеш дип саный. Ирекле базарлар Кытайда, Франциядә киң таралган. Франциядә, мәсәлән, гади кешегә тотылган әйбер­ләрен елга ике мәртәбә шундый базарда сату рөхсәт ителә. Базарларның берсе сентябрь­нең беренче ялында Лилль каласында оештырыла. Ул шә­һәр урамы буйлап әллә ничә чак­рымга кадәр сузыла икән.