01.04.2013 Мәгариф
Бакчага имтихан кирәкми
Яңа уку елында мәктәпкәчә белем бирү учреждениеләре сабыйларга яңа стандартлар нигезендә тәрбия һәм белем бирә башлаячак. Бу хакта Россия Мәгариф һәм фән министрлыгының еллык утырышында сүз булды.
Стандартларның эшче төркеме рәисе, Мәгарифне үстерү федераль институты җитәкчесе Александр Асмолов белдергәнчә, стандартлар дәүләт гарантияләрен тәэмин итүгә, ата-аналар һәм балаларның ихтыяҗын канәгатьләндерүгә юнәтелгән. Яңа “Мәгариф турында”гы Законда беренче тапкыр бакчаларда белем бирүне сыйфатлы итү максатыннан федераль стандартлар эшләү каралган. Март аенда аның проекты җәмәгатьчелек алдына фикер алышуга чыгарылачак. Анда мәгарифкә кагылышы булган, шулай ук кызыксынган кешеләр үз тәкъдимнәрен белдерә ала. Шуның нәтиҗәсендә 1 сентябрьдән бакчалар пилот режимында стандартның төп нигезләмәләрен сынап карый алачак.
– Стандартлар беренче тапкыр кертеләчәк. Моңа кадәр таләпләр генә бар иде. Бакчаларда эшчәнлек мәктәпкәчә белем бирүгә карата федераль дәүләт таләпләре һәм аны тормышка ашыру шартларына таләпләр дигән программаларга нигезләнеп оештырылды. Проектны әле күрмәдек, – ди ТР Мәгариф һәм фән министрлыгының мәктәпкәчә белем бирү бүлеге җитәкчесе Гөлнур Манюрова.
Бүген ил бакчаларында 5 миллионга якын бала тәрбияләнә. 2012 елда Россиядә 2011 елга караганда 100 меңнән артык сабый күбрәк туган. Димәк, алар өчен урыннар булдыру мәслихәт. “Бакчаларда 1,2 миллионнан артык яңа урыннар, шул исәптән 15-20 процентын альтернатив фонд, шәхси сектор ярдәмендә булдыру зарур”, – дигән РФ мәгариф министры Дмитрий Ливанов коллегиядә. 2013 елда яңа бакчалар төзү, искеләрен төзекләндерү планлаштырыла. Шулай ук министр тәрбиячеләрнең хезмәт хакларын тагын 30 процентка арттырырга кирәклеген әйткән.
Соңгы вакытта, стандартлар кертелгәч, сабыйларга имтиханнар бирергә туры килә икән, дигән имеш-мимешләр ишетелә башлады. Югары икътисад мәктәбенең Мәгарифне үстерү институты директоры Ирина Абакина әйтүенчә, бакча яшендәгеләр бернинди имтихан, тест тапшырмаячак, ди. Сабый беренче сыйныфка укырга кергәндә нәрсәләрне белергә тиеш булачак соң? “Ул берәүгә дә бернәрсә дә тиеш түгел. Бүгенге заманда баланың хәтере, игътибары, сөйләме, ни дәрәҗәдә фикер йөртә белүе мөһим. Әгәр алар яшькә карап, тиешенчә үсеш алган икән, бала мәктәпкә баргач, программаны җиңел үзләштерәчәк”, – ди Россия академиясенең балачакның психология-педагогика проблемалары институты директоры Татьяна Волосовец.
Бүген республика бакчаларында хезмәт куючы тәрбиячеләрнең фикерләре белән дә кызыксындык.
– Хәзер балалар өчен эш дәфтәрләре 4 яшьтән үк булдырылган. Алар татар теленнән генә юк. Тәрбиячеләр өчен күбрәк пособиеләр, ягъни ярдәмлекләр булдырылсын иде. Алайса күбрәк үзебезгә Интернет аша эзләргә туры килә. Яңа кызыклы, инновацион программалар кертелсен иде, – ди башкалабызның 327 нче бакча тәрбиячесе Рузилә Мөхәммәтшина. Шулай ук төркемнәрдә балалар саны 15-20 дән артмаса, дәресләр уздыру жиңелрәк булыр иде, дигән теләген җиткерә.
Казанның “Ак калач” бакчасы тәрбиячесе Лилия Ибраһимова соңгы вакытта кертелгән яңа программаларның файдалы булуын әйтә. “Элек дәресләр уздырганда балаларны парта артына утырта идек. Ул вакытта алар бик теләп катнашмадылар. Хәзер уен формасында үткәргәч, күбрәк кызыксына, төпченә башладылар”, – ди ул.