Татарстан да fashion га мохтаҗ! (ФОТО)

Аның кебек егетләр хакында сүз йөрткәндә, еш кына яшьләр теле белән әйтсәк, “креатив, не формат, хәтәр” һ.б шундыйрак сүзләр кулланыла. Бу егет тирәсендә Россиянең иң чибәр кызлары чуала.

Чуалмаслык та түгел шул, Алексей Ким Казанның иң популяр фотографларының берсе. Аның хезмәтләрен хәттә чит ил журналлары да соратып ала. Ә инде Казанда чыга торган ялтыравыклы купшы мода журналларында ул даими автор.

- Алексей, синдә фотограф булу теләге кайчан туды?

-Яшь чакта фотограф булырмын дип уйламаган идем. Университетны тәмамлагач, буш вакытым күбәйде, төшерә башладым. Җәй көне дусларым белән җылы якларга ял итәргә киткәч, шунда аларны төшереп йөрдем. Бу шөгыль миңа ошады, Казанга кайткач та бу эшне дәвам иттем, үз сайтымны ясадым. Модельләргә килсәк, мин беренче төшергән модель - татар егете Эмиль Шига. 2009 елның ноябре минем тормышымда кискен борылыш ясады. Модельләрне объектив аша бәяләргә алындым. Сизә торгансыздыр, туй төшерүче түгел, ә fashion (мода) стилендә төшерәм.

-Хәзер һәр икенче кеше фотоаппаратлы, үзләрен мин фотограф дип йөртүчеләр дә аз түгел. Менә шулардан ничек аерылырга?

-Минемчә, фотограф булу өчен ниндидер сәнгатькә ия булу мөһим түгел. Әгәр дә синдә үҗәтлек, хезмәткә мәхәббәт булса, син, әлбәттә, башкалардан аерылачаксың. Көн саен төшерергә кирәк. Бер көнең дә съемкасыз узарга тиеш түгел. Беренче ике ел мин бик күп төшердем, җәйнең бер аенда 15 съемкам булды. Гел яңа кешеләр белән танышырга ашкынып тордым. Бу юлда куркып калырга кирәкми, гел алга барырга, үзеңне камилләштерергә кирәк! Әгәр fashion юлын сайлыйсың икән, сиңа гел модельләрне төшерү кулайрак. Сер итеп кенә әйтәм, башта тәҗрибәле модельләрне төшерергә алынсаң әйбәт. Чөнки тәҗрибәлеләр белән эшләп үзең дә күп нәрсәгә өйрәнәсең. Кыскасы, гел хәрәкәттә булырга кирәк.

-Ә синең кумирың кем?

-Минем кумирларым юк. Кемнән үрнәк алырга була дисәң, ул мода дөньясының аксакалы Карл Лагерфельд дип уйлыйм. Ул оркестр-шәхес. Үзе киемнәр дә уйлап чыгара, реклама кампанияләре төшерә, Dj – кыскасы, мода дөньясында үз урынын алган кеше. Кайбер җирләрдә яхшы эшли, кайберләрендә бераз хата җибәрә. Ләкин бөтен чараларда катнаша, үз эзен калдырырга тырыша. Миңа калса, бу әйбәт! Гел бер юнәлештә барганчы, төрле яклап үссәң яхшырак. Кеше күпкырлы булырга тиеш бит!

-Татарстанда синең кебек профессионаллар бармы?

-Үземне профессионал димәс идем, чөнки моңа зур мәгънә салынган (мактану кебегрәк). Талантлы фотографлар күп. Казанда мода индустриясе яңа, елга бер-ике сыйфатлы (профессионал) фотограф чыга. Алар үз урыннарын алып, иҗат итә башлыйлар. Барысы да алда, яхшы, тырыш профессионаллар әле чыгачак. Без бу юлның башында торабыз дип әйтмәс идем, аз гына кузгалдык, ләкин искитәрлек глобаль үзгәрешләр әле булмады. Күпләребез эшләү тәртибен аңлый гына башлады.

-Гәдәттә фотографлар күргәзмәләр ясый. Синең иҗатыңны кайда күреп була?


-Без интернетта һәм барлык социаль челтәрләрдә бар. Күргәзмә ясарга әле иртәрәк. Яхшы күргәзмәне күп вакыт үткәч, үз стилеңне булдыргач ясарга кирәк дип саныйм. Гомумән, төрле журналлар өчен төшерәбез, тышлыклар, арт-проектлар эшлибез.

-Фотосъемкада иң мөһим момент нинди? Эшләү процессында нәрсәгә игътибар итәргә кирәк?

-Иҗат ягын, музаларны арткы планга куйсак, беренче планга әзерләнү ягы чыгып баса. Барсын да алдан планлаштырырга яратам. Төрле съемкалар була. Рекламаны колачлаган съемкага килсәк, ул бик күп көч куюны тәлап итә. Чөнки анда бик күп кеше катнаша һәм аңа бер генә көн бирелә, барысын да өлгерергә кирәк. Минем өчен иң мөһиме - тәртип һәм оештыру мизгелләре. Иҗат процессы 15 процент булса, калган 85 проценты - менеджмент, сөйләшүләр, әзерләнүләр.

-Фотограф һәм фотохудожник, фоторәссам - син үзеңне кем дип саныйсың?

-Минем уйлавымча, фотографлар алар һөнәрчеләр. Кемдер өчен һөнәр, кемдер өчен үз фикереңне башкаларга җиткерү. Безнең өчен ул – матур рәсемнәр ясау.

-Алексей, фотосүрәтләр төшерүне үстерү өчен Казанга нәрсә җитми?

-Казанда бу юнәлешне үстерү һәм җәелдерү өчен бернинди авырлыклар да комачауламаска тиеш. Фотографлар бер уйда булмасыннар. Әйтик, мәсәлән, Мәскәүдә барысы да бер стильдә эшлиләр. Бөтенесе бер жанрда, стильдә эшләсә, ул иң куркыныч әйбер дип уйлыйм. Гел эзләнүдә булырга кирәк. Һәм әлбәттә, яшьләргә юл бирергә. Яшь фотографларга, яшь модельләргә, олырак модельләр аларга карап алгарак барачак.

-Яшь фотографларга нинди теләкләрең бар?

-Техника артыннан кумасыннар. Күзәтсеннәр, карасыннар, журналлар укысыннар, башкалар ничегрәк эшли икән дип танышсыннар. Хаталанам дип өркеп калмаска кирәк, шул ук вакытта үз хаталарыңны төзәтә белергә дә өйрәнергә кирәк. Хаталар өстендә эшләп кенә үзеңне табып була. 

1

2

3