Ата-аналардан акча җыйган мәктәпләрне тикшерәләр

Сентябрь башында Казан хокук яклау үзәге үткәргән “кайнар элемтә”гә балалар бакчалары, мәктәпләрдә акча җыюдан зарланып, 140 ата-ана шалтыраткан. Әлеге шикаятьләр респуб­ликадагы 85 мәктәп һәм 3 бакчага кагыла.

– Соңгы елларда әлеге мәсьәлә бик еш күтәрелсә дә, вәзгыять шул килеш кала бирә. Ата-аналардан акчаны башка еллардагы кебек үк сыйныф фонды, сак хезмәте, ремонт, жиһаз сатып алу өчен җыюла­рын дәвам итәләр, – ди ТР Президенты каршындагы ришвәтчелеккә каршы совет әгъзасы, Казан хокук яклау үзәге директоры Игорь Шолохов.

Белгечләр фикеренчә, белем бирү учреждениеләрендә акча җыю ихтыяри ярдәм дип ата-аналардан кәгазьгә кул куйдыртуга кайтып кала башлады. Янәсе, кул куйгач, бәйләнергә урын калмаячак.

“Безнең сыйныфның ата-аналар комитеты җитәкчесе ремонт өчен 2 мең сум акча сорый. Җәен сыйныфыбызның ишеген, торбаларны алыштырганнар. Монысы мәктәп акчасына эшләнгән. Ремонттан соң диварларны обойларга, түшәмне акшарларга мәҗбүр булганнар. Менә шуңа комитет һәр ата-анадан 2 мең сум акча сорый. Соңгы елларда әти-әни­ләрнең фикере үзгәрде, акчаны бирәсе­ләре килми. Комитет җитәкчесе үзе күп бала анасы буларак, ярдәм итми. Мин дә бер тиен дә бирмәдем. Әмма балага мөнәсәбәт үзгәрер дип куркам”, – ди Казан гимназия­сендәге бер укучының әни­се.

– Моннан өч ел элек бер балага ике мең сум сорасалар, хәзер 500 сумнан артык җыймыйлар. Мәктәпләр тикше­рүләрдән шүрли башлады, күрәсең, – ди Дәрвиш­ләр бистәсендә яшәүче танышым.