Бәшәров, Бабкина һәм Шәймиев Чиләбегә "Татар кызы"н сайларга бара

Танылган актер Марат Бәшәров Чиләбедә узачак «Татар кызы - 2012» бәйгесенең йомгаклау тантанасын алып барачак. Әле алай гына да түгел, алар Надежда Бабкина белән тамашачыларны татар телендәге җырлары белән дә сөендерәчәкләр. «Татар кызы - 2012» бәйгесенең сайлап алу өлешләре, ниһаять, тәмам. 5 октябрь көнне Чиләбе шәһәренең «Трактор» боз сараенда инде ярты ел буена дәвам иткән әлеге бәйгенең йомгаклау этабы уздырылачак.

Бәйгедә Көньяк Урал, Курган һәм Свердлау өлкәләреннән барлыгы 300дән артык татар кызлары катнашкан. Аларның бары тик унысына гына финалга чыгу бәхете насыйп булган. Алда аларны тагын да мөһимрәк һәм дулкынландыргычрак бәйгеләр көтә. Кызларның бары тик берсенә генә иң чибәр һәм сәләтле татар кызы исеме биреләчәк, дип хәбәр итә Чиләбе өлкәсе татар конгрессы.

Әлеге бәйрәм тантанасында Россиянең халык артисты Надежда Бабкина һәм танылган актер Марат Бәшәров та катнашыр, дип көтелә. Аларның татар телендәге чыгышлары исә тамашачы өчен үзе зур бер тамашага әвереләчәк. Чиләбе халкы, шулай ук, Татарстан республикасының җыр һәм бию ансамбле иҗаты, танылган модельер Катя Борисованың уникаль кием коллекциясе белән дә танышачак. Чарада Татарстан президенты киңәшчесе Минтимер Шәймиев та катнашыр, дип көтелә.