Россиядә бензин 15 сум торырмы?

Илдә нефть эшкәртү тармагы әкренләп булса да аякка басып килә. Ләкин соңгы елларда авиатранспорт активлыгы арту сәбәпле, илнең бу тармакта эшли торган предприятиеләре авиакеросин һәм кышкы дизель ягулыкка кытлыкны каплый алмый.

Автомобиль йөртүчеләр ни өчен бездә елына 500 миллион тоннадан артык кара алтын чыгарып та бензинга бәянең артып торуын аңлый алмый. Кайбер төбәкләрдә машина ягулыгы кытлыгы да аптырашта калдыра. Белгечләр исә Себердә әле үзләштерелмәгән нефть ятмалары да шактый, дип саный.

Итексез итекчеләр

5-7 сентябрьдә «Казан ярминкәсе»ндә уза торган «Нефть, газ. Нефть химиясе» дип исемләнгән күргәзмәдә әлеге һәм нефть чыгаруга бәйле башка проблемалар хакында фикер алыштылар. 6 сентябрь көнне чараның пленар утырышларында Татарстан Президенты Рөстәм Миңнеханов та катнашты.

Аңа, конференциянең башка кунакларына кебек үк, Россиянең Нефть-газ сәнәгатьчеләре берлеге президенты Геннадий Шмальнең илдә кара алтын табу, эшкәртү проблемаларына багышланган тирәнтен чыгышы ошагандыр. Белгеч җир мае чыгарудагы уңышлар, яңа технологияләр үзләштерү белән горурланып утырудан туктап, тармакта инде шактый еллар яшәп килә торган проблемаларны хәл итәргә чакырды. Алайса, аның фикеренчә, астыбызда нефть булып та, ягулыкка зур чыгымнар тотуыбыз дәвам итәчәк.

Россиягә сыйфатлы бензин кирәк

Икътисад фәннәре кандидаты Геннадий Шмаль проблемадан чыгу юлын нефть эшкәртү күләмен арттыруда күрә. Чөнки Россиядә нефтьтән җитештерелгән әзер продукция күрсәткече алга киткән илләргә караганда шактый аз. Илебез җир маен эшкәртү буенча АКШ һәм Кытайдан кала 3 урында булса да, нефтьчеләребезгә күрсәткечләрне сан ягыннан да, сыйфаты буенча да үстерергә кирәк әле. Геннадий Шмаль сүзләренә караганда, әйтик, Америкада бер тонна җир маеннан 420 тонна бензин алсалар, бездә исә бу күрсәткеч нибары 120 литр гына.

Бензин 15 сум торсын өчен, нефть эшкәртү заводлары кирәк

Узган ел Россиядә нефтьне эшкәртү күләме 11 миллион тоннага артып, 282 миллион тонна тәшкил иткән. Белгечләр сүзләренә караганда, 20 елга беренче тапкыр шундый җитди үсешкә ирешелгән. Монда Татарстанның да өлеше зур. “Ләкин бу нефть чыгару күләме белән чагыштырганда шактый аз, - диде Россия Нефть-газ сәнәгатьчеләре берлеге президенты Геннадий Шмаль “Казан ярминкәсе”ндәге чыгышы вакытында. – Безнең нефть эшкәртү заводларының бик азы гына үзгәртеп кору өчен җитәрлек күләмдә табыш ала”.

Галим Россия бензины бәясенә дә кагылып, заводта аның бер литрының уртача бәясе 10 сум тора дип саный. Чынлыкта исә бүген аны ике тапкырга кыйммәтрәк сатып җибәрәләр. Шуңа ул әлеге мәсьәләгә бәйләп тагын бер кат яңа НПЗлар төзү әһәмиятен аңлатты.

6-7 сентябрьдә «Казан ярминкәсе»ндә узучы «Нефть, газ. Нефть химиясе» күргәзмәсендә кара алтын табу, эшкәртүдә яңа технологияләр, тармакка белгечләр әзерләү, юл салуда, төзелештә нефть продуктларын куллану, сәнәгати экология һәм башка мәсьәләләр буенча "түгәрәк өстәл", пленар утырышлар уза.