|
|
Бүген кемнәр туган
|
|
Архив
|
31.08.2012 Ир белән хатын
Ирләр һәм кибетКөннәр буе кибетләрдә йөрү, кирәкмәгән әйберләргә акча туздыру хатын-кызларга гына хас, дигән фикер яшәп килә җәмгыятьтә. Ләкин шопинг дигәндә, ирләр дә кимен куймый икән бит! Көнбатыш психологлары шундый фикергә килгән. Тик шунысы бар: кибетләрдән ирләр сатып ала торган әйберләр хатын-кызлар җыя торганыннан шактый ук аерыла. Ирләрнең күзе җитдирәк товарларга төшә: китаплар, дисклар, видеоаппаратура, көнкүреш техникасы, машина кирәк-яраклары... Кәһвә кайнаткыч, тузан суырткыч, ноутбук ише нәрсәләр сатып алуны алар акчаны юк-барга туздыру дип түгел, ә кирәкле әйбер алу дип саный. Хатыннары, дус кызлары бер-берсеннән уздыра-уздыра җыйган чүпрәк-чапрак түгел инде! Алай да бу халык кибеттә йөрергә яратуын башкаларга сиздермәскә тырыша.
Шуңа да карамастан, шопингсыз яши алмаучы ирләр соңгы елларда артканнан-арта икән. АКШта яшәүче 10 миллионнан артык ир-ат өчен кибеттә болганып йөрү ихтыяҗы алкогольгә бәйлелек кебек үк чиргә әверелгән. Моның сәбәбен психологлар, үзендә булдырган һәр әйбер саен, ирләрдә адреналин порциясе бүленеп чыга, дип аңлата. Тора-бара адреналин һаман күбрәк кирәк була. Кибеттә күреп ошаткан товар ул кешегә бик-бик кирәк булып тоела, аны сатып алмау үлемгә тиң була башлый. Мондый омтылыш белән көрәшү ирләргә хатын-кызларга караганда авыррак, ди психологлар.
"Шопоголик"лар рәтенә кермәүче ирләрнең дә тормышында, кибеттән кибеткә чабып, кирәкле әйбер эзләү чоры булып ала. Мондый хәл "ау сезоны"нда, ягъни күзе төшкән хатын-кызны ничек кенә булса да үзенә каратырга кирәк чакта була. Нәкъ менә шул чорда көчле җенес вәкилләре гаҗәеп юмартлык күрсәтә, кибетләрдә зур-зур суммаларны һич кызганмый калдырып чыга, мәгъшукасын кыйммәтле бүләкләргә күмә. Ләкин үз дигәненә ирешкәч, сөеклесен гаҗәпләндерү һәм бүләк биреп шатландыру теләге каядыр китеп югала. Хикмәт юмарт ирнең кинәт кенә саранга әйләнүендә түгел. Хәзер инде кибет буенда сөйрәлеп йөрмәсәм дә була, "ау сезоны" ябылды, дип уйлый ул.
|
Иң күп укылган
|