Шикләнелүчеләр саны арта

Вәлиулла Якубны үтерүдә һәм Татарстан мөфтие Илдус Фәизгә һөҗүм ясауда шикләнелгән тагын берничә кеше кулга алынды, дип хәбәр итә “Татар информ”. Шуларның берсе - казанлы Марат Кудакаев. Элек ул Татарстан мөселманнары Диния нәзарәте идарәсенең көч структуралары белән элемтә бүлеге җитәкчесе вазифасын башкарган. Диния нәзарәтендә сигез ел эшләгән, мөфти булып Илдус Фәиз сайлангач эштән азат ителгән.

Ялларда Татарстан башкаласының Вахитов районы судында барган утырышта аңа карата кулга алу чарасын сайлау мәсьәләсе хәл ителде. Ул ике айга сак астында калачак. Тикшерүчеләрнең сүзләренә караганда, хәзер дәлилләр базасын җыю эшләре актив бара. Кудакаев И.Фәизгә булган тискәре мөнәсәбәтләрен яшермәгән, дип саный тикшерү.

ТР мөселманнары Диния нәзарәте идарәсенең элеккеге хезмәткәре бу җинаятьләрдә катнашуын кире кага. Аның сүзләренә караганда, ул яңа мөфти белән каршылыкта булмаган. Тоткарланучы традицион ислам тотуын белдерә.

Кудакаевның адвокаты да тикшерү нәтиҗәләре белән килешми. “Ниятләр дәлил түгел һәм эштән азат итү факты гаепне исбатлау була алмый“, - дип белдерде  ул. Адвокат судьядан тикшерү карарын канәгатьләндермәүне сорады.

ТР буенча Тикшерү идарәсенең аеруча мөһим эшләрне тикшерү буенча беренче бүлеге Татарстан мөфтие Илдус Фәизны үтерергә җыенуда шикләнелгән 26 яшьлек Абдунозыйм Атабоев та сак астына алынды, дип хәбәр итә. Ул  Фәизовның машинасы шартлаганчы аның артыннын үз машинасында барган, ә аннары фаҗига урыныннан тиз арада югалган.

Шулай ук шикләнелүчеләр арасында авыр атлетика буенча Татарстан республикасы чемпионы 25 яшьлек Артем Калашовта та бар. Спортчы “Батыр” спорт комплексында шөгыльләнә. Ул тоткарланганчы вузга укырга керергә, авыр атлетика буенча Россия чемпионаты һәм 2013 елгы Универсиада чыгышларына әзерләнгән. Ул да сак астына алынды.

Тикшерү органнары тоткарланган затларның җинаять кылуда катнашуын җентекләп тикшерә. Әгәр бу эш буенча җыелган дәлилләр аларның катнашуын исбатланмаса, әлеге затлар азат ителәчәк, дип ассызыклый Россия Тикшерү комитетының ТР буенча Тикшерү идарәсе җитәкчесенең өлкән ярдәмчесе Эдуард Абдуллин.

Исегезгә төшерәбез, Вәлиулла Якубны үтерүдә һәм ТР мөфтие Илдус Фәизгә һөҗүм ясауда шикләнелгән 4 кеше кулга алынган иде инде. Болар“Идел-Хаҗ” компаниясе директорлары советы рәисе, 57 яшьлек Рөстәм Гатауллин, “Вакыф” мәхәлләсе җитәкчесе, Казанда яшәүче 39 яшьлек Морат Галиев, Биектау районында яшәүче 41 яшьлек Айрат Шакиров һәм Лаеш районында яшәүче 31 яшьлек Азат Гайнетдинов. Соңрак Азат Гайнетдинов сак астыннан азат ителде, дип белдерде Эдуард Абдуллин.