Авылыбыз белән горурланырбыз әле

Аллаһының кодрәте белән җылы, шифалы яңгырлар явып үтте, ә соңгы көннәрдә матур итеп кояш та кыздыра башлады. Әйтерсең лә, халыкның махсус заказын үтәп, Ходай Тәгалә печәннәргә кибәргә мөмкинлек бирә. Мин Похвистнево районы Мәчәләй авылы җирлеге җитәкчесе урынбасары Равил Фәрит улы Уразмәтов белән басуга килеп җиткәндә, биредә кызу эш кайный иде. Әнә печән җыючы агрегат артыннан печән төргәкләре тезелеп кала. Авылның эшчән ирләре аларны машина һәм тракторларга төяп, урынына илтеп торалар. Мин бу күренешләргә сокланып карап торган арада Мәчәләйнең “Бердәмлек” газетасының авыл хәбәрчесе Шамил абый Мамышев та килеп җитте.

- Соңгы вакытта авылыбызда зур үзгәрешләр булды бит әле. Авыл хуҗалыгы производствосы башлыгы итеп яшь кешене сайлап куйганнан соң, юллар, күперләр төзекләндерелде. Мәктәптәге балалар бакчасына, ашханәгә капиталь ремонт ясалды. Самарада яшәүче милләттәшебез Фәхретдин Канюкаев ярдәмендә бик матур, зур Сабан туе үткәрдек. Әгәр дә эшләр шулай дәвам итсә, матур тормышларны күрергә тагын насыйп булыр әле, - дип сөйли башлады. Шул мизгелдә хуҗалыкның яңа җитәкчесе Ринат Искәндәров пәйда булды. Шунысы кызык, авыл халкы аны элеккегечә колхоз рәисе дип атый икән.

- Эшләр ничек бара? – дип сорыйм Ринаттан.

- Бик яхшы. Авыл халкы бер булып эшкә кереште. Чәчкән икмәкләребез матур гына башак кыса. Иншалла, икмәксез калмабыз, дип уйлыйм. Әле менә күргәнегезчә, кышкылыкка печән хәзерләп яткан чагыбыз. Эшчеләребезгә печәнне бушлай кайтарабыз. Көзгә табарак фураж, салам белән дә тәэмин итәргә җыенабыз. Хезмәт хакын да ай саен түләп барабыз. Аның күләме тагын да күтәрелер, дип исәплим.

Калган печәнне фермага ташып, өеп куярбыз. Аллаһы язса, көздән терлек үрчетә башларга ният бар.

- Ринат, эшчеләрегез күпме соң?

- Мин эшли башлаганчы биредә барлыгы 7 кеше генә иде. Хәзерге вакытта. “Айбагар” эшкәртү цехын да кушып әйтсәм, 30 дан артык эшчебез бар. Алар барысы да ирләр. Киләчәктә хатын-кызларга да эш булыр әле, дип уйлыйм.

Малай-шалай тик ятмасын өчен, мәктәп янында футбол стадионы булдырдык. Тренер Наил Сапуковка хезмәт хакы билгеләнде. Спорт белән шөгыльләнүче егетләребез район күләмендәге төрле чараларда катнашып, призлы урыннарга лаек булып торалар.

Ярдәм сорап килгән авылдашларны кире бора торган гадәт юк, кулыбыздан килгән кадәр булышырга тырышабыз. Җәмәгать эшләрендә дә актив катнашабыз.

- Киләчәккә нинди планнар белән яшисез?

- Көзгә май чыгару эшен көйләп җибәрергә дигән ниятебез бар. Дәүләт грантына дәгъва итәргә дә исәп тотабыз. Көзге уңышны җыеп алгач, яңа техника сатып алырга телибез.

Сүзгә хуҗалыкның агрономы Рәфкать Сөләйманов кушыла:

- Күптән түгел заман таләпләренә җавап бирүче “Амечка” дип аталган чәчкеч сатып алдык. 15 - 20 ел буе чәчкән бодай урынына Кинель фәнни-тикшеренү институтыннан яңа сорт бодай кайтарып чәчтек. Башка культураларны да төрләндерергә уйлап торабыз. Быел 1200 гектар мәйданда ашлык чәчелде. Бу былтыргыга караганда 350 гектарга күбрәк. Ә көзгә таба ”Савруха” акционерлык җәмгыятенә аренда-га бирелгән җирләребезне дә кире кайтарып, чәчү җирләрен тагын да киңәйтергә исәплибез. Җирләребезгә минераль ашламалар 15 - 20 ел буе кертелмәгән, гербицидлар белән эшкәртелмәгән булса, хәзер инде бу эш тә җайланды.

Авылда 64 буш йорт тора. Әгәр дә җирләр эшкәртелеп, хуҗалыгыбыз аякка басса, читтә каңгырап йөрүче яшьләребез дә авылга кайтырга җыеналар.

Әйе, “кунак аз утыра, күп сыный”, ди халык. Элек Мәчәләйгә килгәндә күңелне шомлы тынлык борчый иде. Ә бүген мин тыныч, чөнки биредә тулы тормыш кайный. Моны авыл кешеләренең нур кунган йөзләреннән, техника гөрләвеннән, печән һәм җиләк исе белән тулган йортлардан күреп була. Авыл кешесе өчен моннан да зур бәхет бармы икән соң?!

Сабуллашканда Ринат Зәйнулла улыннан:

- Максатыгыз нидә? – дип, сорамый булдыра алмадым.

- Авылыбызны аякка бастыру. Мәчәләй Самара өлкәсендә иң зур, дәрәҗәле, уңган, алдынгы авыл булып санала иде бит. Элек биредә умартачылык, сарык, мөгезле эре терлек, ат, кошчылык фермалары бар иде. Алдагы көндә уңган, тырыш хезмәткәрләребез ярдәмендә алар барысы да сафка басачак. Авылыбыз һәм аның кешеләренең даны бик еракларга таралыр һәм без, яшьләр, туган җиребез белән горурланырбыз әле, - дип җавап бирде ул.

РӘСЕМДӘ: Басканнар: (сулдан өченче) авыл җирлеге җитәкчесе урынбасары Равил УРАЗМӘТОВ, (дүртенче) "Восток" авыл хуҗалыгы предприятиесе җитәкчесе Ринат ИСКӘНДӘРОВ һәм (бишенче) агроном Рәфкать СӨЛӘЙМАНОВ бер төркем хезмәткәрләр арасында.