«МАТРАСЫГЫЗДА КОРТЛАР ЯШИ!»

Казанда яңа мода – ниндидер фирма вәкилләре фатирдан-фатирга йөреп, “супер” тузан суырткыч рекламалап йөри. Безгә дә беркөнне кич белән тузан суырткыч күтәреп килеп керделәр. Яшь кенә егет керә-керешкә тузан суырткычны мактап, тартмаларын бушата башлады, теле телгә йокмый. Бу тузан суырткычы очкычлар ясый торган тимердән эшләнгән, шлангасы да үтә чыдам – очкычларга күктә ягулык тутыра торган шланг материалыннан эшләнгән икән. Һәртөрле җайланмаларны аңлата, һәрберсесенең өстенлекләрен мактый. Кешене бер сөйли башлагач тиз генә куып та чыгарып булмый, тузан суырткычының “автобиографиясен” дә тыңлап утырасы килми, чөнки аны барыбер алырга җыенмыйбыз. Хәер, нормаль кеше аны алмыйдыр да инде, чөнки бәясе аяктан егарлык: 120 мең сум.

– Казанда шушы бәягә тузан суырткычы алырдай кешеләр бик күпмени соң? – дип кызыксынам дилер егеттән.

– Без Русиядә күптән түгел генә эшли башладык, чират торып алмасалар да, кызыксынучылар, кредитка алырга теләүчеләр шактый. Чөнки безнеке шикелле көчле техниканы бүтән бер фирма да ясамый. Бүгенгә Казанда 5 мең тузан суырткычын саттык инде ,– диде егет.

Юк, 120 меңгә тузан суырткычы сатып алган кеше барлыгына ышанмыйм! Инде мөмкинлекләрең зур икән, 20-30 меңгә дә менә дигән суырткычлар тулып ята лабаса! Чыгарып салды ди сиңа бай кеше тик торганда андый акчаларын! Монысының да чын бәясе шул тирәдер әле, Русия халкының җүләрлегеннән чираттагы мәртәбә файдаланмакчы булалардыр. Супер тузан суырткычының тизрәк эшләвен күрергә теләп кыбырсый башладым. Юк, лекция дәвам итә. Һәм, ниһаять, сәгать ярым чамасы вакыт узгач, караваттагы матрастан тузан суыртып күрсәтте бу. Махсус капчыкка җыелган тузанны ачып күрсәтте. Ну, җыелган инде күпмедер тузан.

– Сезнеңчә, бу нәрсә? – дип сорады дилер, тузанга төртеп күрсәтеп.

– Тузан, – мин әйтәм.

– Юк, тузан түгел ул, ә кортлар. Менә шушы кортлар һәм аларның кәкәйләре, – диде дә караватка зур, куркыныч корт сурәтен чыгарып куйды. Үзе миңа карап тора. Аның планы буенча мин куркуымнан аңымны җуеп егылырга тиештер инде, аннары, һушыма килгәч, суырткычны кредитка теркәтеп, үзебездә калдырырга. Әмма минем исем дә китмәде.

Хет әллә нинди супер булса да, бөтен дөнья шуны кулланса да машина бәясе тора алмый бит инде ул! Берничә танышының телефонын язып алгач, дилер егет тимер-томырын җыеп, көчкә күтәренеп чыгып китте. Кешелек дөньясы бер-берсен алдап, акча савар өчен ниләр генә уйлап чыгармый – шаклар катарсың...