Лаеклы яшәү шул була

Лаеклы яшәү өчен россиялеләргә аена уртача 27 мең 200 сум акча кирәк. “Левада-Центр” үткәргән социологик сораштыруның нәтиҗәсе шуны күрсәтә. Ә чынлыкта Россия халкының яшәү минимумы хәзер 12 мең сумннан аз гына күбрәк.

Сораштыруда Рос­сия­нең 45 төбәгендә яшәү­челәр катнашкан. Ни гаҗәп, аларның күпчелеге яхта, шәһәр чи­тендәге зиннәтле йорт турында да, сәяхәт итү, чит ил автомобиле, кыйм­мәтле яңа технология җиһазларына ия булу хакында да хыялланмый икән. “Күпчелек өчен лаеклы яшәү ул – нәрсәгәдер мохтаҗлык күрмичә генә, әҗәткә алмыйча гына, очны очка ялгап бару һәм аз булса да җыелган акчага ия булу ди­гән сүз”, – ди “Левада-Центр”ның директор урынбасары Алексей Гражданкин. “Мөгаен, бу илнең тарихына бе­лән бәйледер”, – дип аң­лата ул моны.

“Лаеклы яшәү бәясенең шундый кечкенә булуы Россия халкының фатир алырга ашкынып тормыйча, әти-әни­ләре белән бер түбә ас­тында яшәүне кулайрак күрүенә дә бәйле”, – ди «Норд Капитал» инвестицияләр төркеменең аналитика департаменты директоры Владимир Рожанковский. Аның фикеренчә, яшь­ләрнең ипотека өчен түләүләре дә исәпкә алынса, бу сумма ике тапкыр зуррак булыр иде.

Тикшеренү нәтиҗәләре күрсәткәнчә, россияле­ләрнең яртысыннан артыгы гаиләсенең матди хәлен уртача дип бәяләгән. 17 проценты үзләрен яхшы һәм бик яхшы хәлле гаилә дип саный. Сораштырылганнарның 25 проценты начар һәм бик начар хәлле гаилә вәкилләре булуын белдерә. Шундый ук сораштыру узган ел да үткәрелгән. Аннан күренгәнчә, былтыр россиялеләргә лаек­лы яшәү өчен уртача 24 мең сум акча кирәк булган.