Илназ Сафиуллин «Кәеф ничек?» газетасын ник сатып алган?

«Bars Media» үзенең шактый популяр басмасыннан ник котылырга теләгән - монысы билгесез. Илназның исә планнары зурдан. Кечкенәдән үк журналистикага мөкиббән икән ул. Газета чыгарып, татар телен үстерүгә үз өлешен кертмәкче.

Газета-журналлар - татар телен үстерүнең бер өлеше, дип саный Илназ. Максаты - һәр татар гаиләсенә, бер генә төрдә булса да, вакытлы басма алдырту. "Кәеф ничек?"нең гамәлгә куючысы алышынуга карамастан, әлегә анда ниндидер зур үзгәрешләр булыр дип көтелми. Илназ үзе исә, укучылардан килгән бер генә хат та, бер генә тәкъдим дә игътибарсыз калмаячагын ышандыра. 

 Билгеле булганча, Илназ Сафиуллинның “Tamasha.ru” сайты да эшләп килде. Хәзер ул “Кәеф ничек?”нең рәсми сайты булачак ди. Редакция коллективы да тиз арада «Bars Media» бүлмәсен азат итеп, Илназ офисына күчәргә тиеш. 

Әйтергә кирәк, Илназ “Кәеф ничек?”не финанс ягын яхшыртыр өчен сатып алган дигән сүзләр йөри. Әмма җырчы ышандырганча, финанс мәсьәләләрнең моңа бернинди катнашы да юк.

Тиздән газета-журналларга икенче яртыеллыкка язылу сезоны тәмамлана. Илназ "Кәеф ничек?"нең тиражын 15 меңгә  җиткермәкче. Шуның өчен бу көннәрдә ул, “Болгар” радиосы белән берлектә почта бүлекләрендә очрашулар оештырып, кечкенә генә концерт куеп, бәйгеләр, уеннар уйнатып халык белән аралаша.