|
|
Бүген кемнәр туган
|
|
Архив
|
15.05.2012 Сәясәт
Бездә Мәскәүдә эшләрлек җитәкчеләр бармы?Шушы көннәрдә Россия Хөкүмәтенең яңа составы билгеле булыр дип көтелә. Яңа Премьер-министр үзенең командасын төзегән инде. Әлегә исемнәр хәбәр ителми. Ә кайбер мәгълүматларга ышансаң, алар арасында Татарстан вәкилләре дә булырга мөмкин. Ә сезнең фикерегезчә, республикада федераль Хөкүмәттә эшли алырлык кешеләр бармы? Илсур САФИУЛЛИН, Татарстан Дәүләт Советы депутаты:
– Минемчә, республикада министр вазыйфаларын башкарган кешеләрнең барысы да Россия күләмендә эшли алырлык дәрәҗәдә тәҗрибәле белгечләр. Шуңа күрә безнең һәрбер министрны Мәскәүгә чакырырга була. Андыйлар булды бит инде. Элеккеге спорт министры Марат Бариев китте. Марат Хөснуллин Мәскәү хакимиятендә эшли. Тик ул башкарган вазыйфа федераль министрныкыннан бер дә ким түгел. Әмма бездәге җитәкчеләрне Мәскәүгә җибәрергә кирәк микән? Алар үзебезгә дә кирәк бит. Чөнки министр булып эшләве җиңел түгел. Яңа җитәкче табып була, әмма бу эшне яхшы итеп башкара алырлык кешеләр күп түгел. Шуңа күрә үзебездә калсалар яхшырак булачак. Минемчә, яңа Хөкүмәттә министрлар алмашынса да, эшчәнлегендә әлләни үзгәрешләр күп булмаячак. Президент белән Премьер-министр урыннарын гына алмашты бит.
Наил ХӨСНЕТДИНОВ, “Ак барс” хоккей клубының реклама һәм маркетинг бүлеге җитәкчесе:
– Миңа калса, андый кешеләр җитәрлек. Әнә бит, республиканың элеккеге төзелеш министры Марат Хөснуллин хәзер Мәскәүдә икенче кешегә әверелде. Андыйлар бездә тагын бар. Димәк, эшли беләләр. Яңа Хөкүмәт җитәкчесе дә үзенә тырыш, вазыйфасын яхшы итеп башкара торган кешеләр җыяр дип уйлыйм. Алар бит бездәге үзгәрешләрне күреп торалар. Шуңа күрә яңа Хөкүмәттә бездән дә кешеләр була икән, бер дә гаҗәпләнмәячәкмен. Җитмәсә, соңгы вакытта Мәскәүгә башка төбәкләрдән килгән җитәкчеләр бик күп.
Елена ГОРБУНЧИКОВА, журналист:
– Әгәр миннән генә торса, федераль Хөкүмәткә Татарстанның мәгълүматлаштыру һәм элемтә министры Николай Никофоровны алыр идем. Бердән, ул яшь. Икенчедән, инде үз эшен күрсәтергә өлгерде. Бездән башка кешенең Мәскәүгә китәсен күз алдына китерүе кыенрак. Әлбәттә, кем генә булмасын, Россия башкаласында эшләве дә җиңел түгел.
Марат ЗИННӘТУЛЛИН, эшмәкәр:
– Казанда эшләсәң ни, Мәскәүдә ни... Җитәкчелек алдында торган җаваплылык һәм эш күләме барыбер шул кадәр үк, минемчә. Мәскәүгә китеп эшли алырлыклары юк икән, Татарстанда җылы кәнәфи алып та утырмасыннар. Мәсьәләнең икенче ягы бар. Безнең түрәләрнең эше шул кадәр үк мактанырлык микәнни? Юллар җимерек, ТКХны халык гел сүгеп тора, мәктәпләрдә татар теле юкка чыгып бара. Саный китсәң, бездә төзәтерлек кимчелекләр бик күп.
Элькин ИСКӘНДӘРОВ, Татарстан Студентлар Лигасының вице-президенты:
– Дөресен генә әйткәндә, миндә бу хакта бернинди дә мәгълүмат юк. Мәскәүдәгеләр Татарстан Студентлар Лигасы вәкиленең фикеренә дә колак салыр дип уйламыйм. Әмма кайсыдыр сайтта Рөстәм Нургалиевичны Россия авыл хуҗалыгы министры вазыйфасына чакырырга теләгәннәре турында укыган идем. Николай Никифоровның да Мәскәүгә китүе турында сүзләр йөри. Бу хәбәрләр минем өчен яңалык, әмма гаҗәп түгел. Чөнки бездә федераль дәрәҗәдә дә эшли алырлык җитәкчеләр җитәрлек. Шуңа күрә алар яңа Хөкүмәткә эләгә икән, бер дә гаҗәпләнмәячәкмен. Чөнки Татарстан инде күптән илнең иң алга киткән төбәкләренең берсенә әверелде. Безнекеләрнең тәҗрибәсе бөтен ил өчен файдалы булыр иде.
|
Иң күп укылган
|