|
|
Бүген кемнәр туган
|
|
Архив
|
20.04.2012 Мәдәният
Тукайга багышлау (ФОТО)19 апрельдә Габдулла Тукай исемендәге Татар дәүләт филармониясе “Тукайга багышлау” дигән концерт программасын тәкъдим итте. Телсез идек, Тукай безне телле итте, Җырсыз идек, Тукай безне җырлы итте… (Сәйфи Кудаш)
Программада бөек шагыйрьнең сүзләренә язылган җырлар, милли көйләр, романслар һәм татар композиторларының операларыннан арияләр яңгырады. Концертны Татарстан Республикасы фольклор музыкасы дәүләт ансамбленең сәнгать җитәкчесе, Россиянең атказанган, Татарстанның халык артисты Айдар Фәйзрахманов белән Татарстанның атказанган артисткасы Лилия Аппакова алып бардылар. Кичәне Фольклор музыкасы дәүләт ансамбле башлап җибәрде. Бу ансамбль оста биюләре белән дә, җырлаулары белән дә киң данлыклы. Тамашачы аларны бик җылы итеп каршы алды. Сәхнәдә бу көнне Тукай шигырьләрен дә ишетеп булды. Бигрәк тә нәни кыз белән малай укыган “Бала белән күбәләк” истә калды. Концертның икенче бүлегендә сәхнәгә Халык уен кораллары дәүләт оркестры чыкты. Аларга Опера һәм камера музыкасы бүлеге солистлары булышты. Айрат Имашев, Ригина Вәлиева, Георгий Ибушев һәм Резедә Галимова башкарган әсәрләр аеруча көчле алкышлар белән каршыланды. Кичә азагында Габдулла Тукай сүзләренә язылган “Туган тел” җырын бөтен зал кушылып башкарды. Артистлар өчен дә, тамашачы өчен дә Тукай бәйрәме онытмслык бер мизгел генә булып тыелды.
1 2 3 4 5
|
Иң күп укылган
|