Су баса!

Татарстан коткаручыларының эше бермә-бер артты. Ташу башлануга, республиканың төрле районнарыннан су басу һәм шуның нәтиҗәсендә зыян күрүчеләр турында хәбәрләр килә башлады. Алдагы ике тәүлектә һава шартлары су басу куркынычын тагын да арттырачак, ди синоптиклар.

Кичә Татарстан Министрлар Кабинетында узган Гадәттән тыш хәлләрне кисәтү комиссиясе утырышында да тынычланырга иртәрәк ди­гән фикер яңгырады. “Алда тагын да куркынычрак булырга мөмкин”, – диде Татарстан гадәттән тыш хәлләр министры Рәфис Хәбибуллин. Министрлыктан алынган мәгъ­лүматларга караганда, су басу һәм ташу нәтиҗәсендә газ торбасына зыян килү очраклары Лениногорск, Алабуга, Әлки, Баулы, Тукай, Яңа Чишмә һәм Түбән Кама районнарында теркәлгән. Баулы районында ташу ике авыл – Исергәп һәм Татар Томбарлысында яшәүчеләргә зыян салган. Беренчесендә – 23, ә икенчесендә 27 хуҗалыкны су баскан. Утыздан артык кешегә, яшәгән йортларын калдырып, вакытлыча мәктәп бинасына күченергә туры килгән. Район аша узучы Казан – Оренбург юлы да берничә сәгатькә су астында калган. Яңа Чишмә һәм Тукай районнарында исә елгадагы боз газ торбасына зыян салган. Нәтиҗәдә барлыгы биш авылга ягулык бирү өзелгән.

Кичә гадәттән тыш хәл теркәлгән районнар исем­легенә Түбән Кама да өстәлде. Ташу Байгол, Ялантау, Кызыл Чапчак һәм Каенлы авылларында яшәүчеләрне куркуга салган. Авылларны өлешчә су баскан. Коткаручылар әйтүенчә, әлеге авыллар сулыклар янәшә­сендә урнашкан. Шуңа күрә су басу куркынычы зур. Бәла-каза чыккан очракта, авыл халкына кирәк-яракларны алдан ук әзерләп куярга киңәш иткәннәр. Бел­гечләр әйтүен­чә, былтыр көз көне кар аз яуды һәм җир туңган. Нәти­җәдә язгы су җиргә сеңәргә өлгерми.