Тимофеев штрафын түли алырмы?

Татарстанның Югары суды ришвәт алуда тотылган Александр Тимофеевны 300 миллион сум штрафка тартты. Югары Осланның элеккеге башлыгына 3 ел дәвамында җитәкче урыннарда эшләргә тыелганын исәпкә алсак, аның бу сумманы ничек юнәтәчәге күпләрдә зур кызыксыну уята.

Матбугатта Тимофеев турында хәбәр бирелүгә үк, киң җәмәгатьчелек бу теманы шунда ук эләктереп алды. Күпләрне хәзер ришвәт алуда тотылган түрәнең 300 миллион сумны кайдан алып түләве борчый. Россиянең Җинаять-башкарма кодексының 31нче маддәсендә күрсәтелгәнчә, җаваплылыкка тартылган кеше штрафны хөкем чыгарылганнан соң 30 көн эчендә түләргә тиеш. Аның мондый мөмкинлеге юк икән, суд аның мөрәҗәгате белән түләүне 3 елга кадәр суза ала.

Димәк, суд Александр Тимофеевка карата йомшаклык күрсәткән мәлдә дә, аңа елына ким дигәндә 100 миллион сум акча юнәтергә кирәк. Кызык өчен, 2010 елда моңа якын сумманы — 99,1 миллион сумны «Газпромбанк» ачык акционерлык җәмгыяте баш бухгалтеры эшләп алган булган. Ләкин ришвәт алуда гаепләнгән кешегә андый эшкә урнашу авыррак булыр шул...

 300 миллион сумның күпме икәнен чамалау өчен әлеге акчаларның, мәсәлән, «Аэрофлот», «Ростелеком» кебек компанияләрнең идарә әгъзаларына еллык тәләү күләмен тәшкил итүне әйтергә була. Шул ук вакытта мондый кәттә сумма халык тормышын яхшыртуга да зур өлеш кертә ала. Әйтик, 2012 елда Псков өлкәсенең сәламәтлек саклау тармагын яңартуга, Томск шәһәрендә халыкны тузган торактан күчерүгә 300 миллион сум акча тотылачак. Президент сайлавын уздыру өчен Татарстанның 250 миллион сум алачагы мәгълүм. Тулы бер республика халкының язмышын тәэсир итәрдәй сумманың бер кешегә түләргә мәҗбүр ителүенә, 300 миллион белән чагыштырганда чүп кенә тоела торган 10 миллион сумлык ришвәт алу «гаепле».